اسلام آباد: وفاقی حکومت نے مالی سال 2025-26 کے لیے جنرل پروویڈنٹ فنڈ (جی پی فنڈ) کی بچتوں پر ملنے والے منافع کی شرح میں مزید کمی کا اعلان کر دیا ہے۔ وزارتِ خزانہ کی جانب سے جاری کردہ نوٹیفیکیشن کے مطابق جی پی فنڈ پر منافع کی شرح گزشتہ مالی سال کے 12.46 فیصد سے کم کرکے اب 12.05 فیصد مقرر کر دی گئی ہے۔
وزارتِ خزانہ نے اس نئی اور نظرثانی شدہ مارک اپ شرح پر فوری عملدرآمد کے لیے کنٹرولر جنرل آف اکاؤنٹس (سی جی اے) کو باضابطہ طور پر آگاہ کر دیا ہے۔ اعداد و شمار کے مطابق حکومت کی جانب سے اس اہم فنڈ پر منافع مسلسل کم کیا جا رہا ہے؛ مالی سال 2023-24 میں جی پی فنڈ پر منافع کی شرح 13.97 فیصد تھی، جو مالی سال 2024-25 میں کم ہو کر 12.46 فیصد پر آئی اور اب مالی سال 2025-26 کے لیے اسے گھٹا کر 12.05 فیصد کر دیا گیا ہے، جس سے سرکاری ملازمین کی بچتوں پر منافع مزید کم ہو جائے گا۔
