لاہور:پاکستان میں مون سون بارشوں کا ایک نیا طاقتور سسٹم داخل ہو گیا ہے، جس کے زیرِ اثر آئندہ 24 گھنٹوں کے دوران لاہور سمیت پنجاب کے بیشتر اضلاع میں کہیں ہلکی تو کہیں موسلا دھار بارش کا امکان ہے۔ محکمہ موسمیات کے مطابق لاہور میں مطلع ابر آلود رہنے اور دھوپ چھاؤں کا سلسلہ جاری رہنے کے ساتھ دوپہر بعد بادل برسنے کی توقع ہے۔
محکمہ موسمیات کا کہنا ہے کہ لاہور میں آج کم سے کم درجہ حرارت 31 ڈگری سینٹی گریڈ جبکہ زیادہ سے زیادہ 39 ڈگری سینٹی گریڈ تک جانے کا امکان ہے۔ شہر میں 24 جولائی تک وقفے وقفے سے بارشوں کا سلسلہ جاری رہنے کی پیشگوئی کی گئی ہے۔
ممکنہ بارشوں کے پیشِ نظر پی ڈی ایم اے (PDMA) پنجاب نے تمام ضلعی انتظامیہ کو ہائی الرٹ جاری کر دیا ہے اور نشیبی علاقوں میں پیشگی حفاظتی انتظامات مکمل کرنے کی ہدایت کی ہے۔
دوسری جانب ایم ڈی واسا غفران احمد نے لاہور میں بارش کے پیشِ نظر تمام آپریشنل عملے کو الرٹ رہنے کا حکم دیا ہے۔ انہوں نے واضح کیا کہ شہر کی اہم شاہراہوں اور نشیبی علاقوں سے پانی کے نکاس تک افسران اور فیلڈ عملہ فیلڈ میں ہی موجود رہے گا۔
حکام کی جانب سے شہریوں کو ہدایت کی گئی ہے کہ بارش کے دوران غیر ضروری سفر سے گریز کریں اور موسم کی بدلتی صورتحال پر نظر رکھیں۔ بجلی کے کھمبوں اور کمزور عمارتوں سے دور رہنے کا مشورہ بھی دیا گیا ہے تاکہ کسی بھی ناخوشگوار واقعے سے بچا جا سکے۔
مون سون کے نئے سلسلے کی انٹری؛محکمہ موسمیات کی 24 جولائی تک بارشوں کی پیشگوئی، الرٹ جاری
