مون سون کا نیا سلسلہ داخل: محکمہ موسمیات کی پنجاب اور خیبرپختونخوا میں اربن فلڈنگ کی وارننگ

اسلام آباد:محکمہ موسمیات (پی ایم ڈی) نے ملک کے بالائی اور وسطی علاقوں میں مون سون ہواؤں کے داخلے کے بعد شدید بارشوں کی پیش گوئی کر دی ہے۔ محکمہ موسمیات کے مطابق، بحیرہ عرب سے آنے والی نمی والی ہوائیں مزید شدت اختیار کر رہی ہیں، جبکہ پیر کے روز سے مغربی ہواؤں کا ایک نیا سلسلہ بھی ملک کے بالائی حصوں کو اپنی لپیٹ میں لے لے گا، جس سے موسلادھار بارشوں کا امکان ہے۔
موسمیاتی تجزیے کے مطابق 18 سے 25 جولائی کے دوران کشمیر اور گلگت بلتستان میں موسلادھار بارشوں سے لینڈ سلائیڈنگ کا خدشہ ہے۔ 19 سے 23 جولائی کے دوران اسلام آباد، راولپنڈی، پشاور، لاہور، فیصل آباد، گوجرانوالہ اور سیالکوٹ سمیت خیبرپختونخوا اور وسطی پنجاب کے بیشتر شہروں میں طوفانی بارشیں متوقع ہیں۔ جنوبی پنجاب کے شہروں ملتان، ڈیرہ غازی خان اور بہاولپور میں بھی 20 سے 24 جولائی کے دوران بارشوں کا سلسلہ رہے گا۔ بلوچستان کے شمالی و شمال مشرقی اضلاع اور سندھ کے کچھ حصوں بشمول سکھر، لاڑکانہ اور دادو میں بھی گرج چمک کے ساتھ بارش کی توقع ہے۔ کراچی میں ہفتہ اور اتوار کے روز مطلع ابر آلود رہنے اور ہلکی بارش یا بوندا باندی کی پیش گوئی کی گئی ہے۔
محکمہ موسمیات نے خبردار کیا ہے کہ 20 سے 23 جولائی کے دوران بڑے شہروں (اسلام آباد، راولپنڈی، لاہور، فیصل آباد اور پشاور) کے نشیبی علاقوں میں شہری سیلاب (Urban Flooding) کا خطرہ ہے۔ اس کے علاوہ ڈی جی خان اور بلوچستان کے برساتی نالوں میں اچانک طغیانی آنے کا امکان ہے۔ تیز ہواؤں اور آسمانی بجلی سے سولر پینلز، بجلی کے کھمبوں اور کمزور ڈھانچوں کو نقصان پہنچ سکتا ہے۔
حکام نے سیاحوں، مسافروں اور کسانوں کو غیر ضروری سفر سے گریز کرنے اور موسمی صورتحال کے پیشِ نظر پیشگی احتیاطی تدابیر اختیار کرنے کی ہدایت کی ہے۔ متعلقہ اداروں کو کسی بھی ہنگامی صورتحال سے نمٹنے کے لیے الرٹ رہنے کا حکم دیا گیا ہے تاکہ جان و مال کے نقصانات سے بچا جا سکے۔