جیکب آباد:رپورٹ مجیب کھوسو
جیکب آباد: ایس ایس پی جیکب آباد کیپٹن (ر) فیضان علی کی منشیات کے خلاف زیرو ٹالرنس پالیسی اور سخت ہدایات پر عمل کرتے ہوئے سی آئی اے پولیس نے کامیاب کارروائی کے دوران بین الصوبائی منشیات اسمگلنگ کی بڑی کوشش ناکام بنا دی۔سی آئی اے جیکب آباد کے انچارج عمر الدین بنگلانی نے اپنی ٹیم کے ہمراہ خفیہ اطلاع پر تھانہ صدر کی حدود ممل پھاٹک کے قریب چیکنگ کے دوران ایک موٹر سائیکل کو روک کر تلاشی لی۔ کارروائی کے دوران بین الصوبائی منشیات اسمگلنگ گروہ سے تعلق رکھنے والے دو ملزمان، جن میں ایک خاتون بھی شامل ہے، نیاز احمد ولد میوو خان کھوسو اور مسمات ہاجرہ عرف صاحبہ عرف ممتاز زوجہ غلام محمد دین کھوسو، سکنہ پتھر موڑ کو گرفتار کر لیا گیا۔پولیس کے مطابق ملزمان کے قبضے سے 2500 گرام چرس، 1000 گرام آئس اور 30 گرام ہیروئن برآمد ہوئی، جبکہ اسمگلنگ میں استعمال ہونے والی موٹر سائیکل بھی تحویل میں لے کر ضبط کر لی گئی۔ابتدائی تفتیش کے مطابق گرفتار ملزمان بلوچستان سے سندھ منشیات اسمگل کر رہے تھے۔ پولیس نے ملزمان کے خلاف متعلقہ دفعات کے تحت مقدمہ درج کرکے مزید تفتیش شروع کر دی ہے۔