ٹوپی بازار میں انتظامیہ کا آپریشن، متعدد دکانداروں کو جرمانے اور وارننگ

صوابی ۔ (حق نواز خان)

ایڈیشنل اسسٹنٹ کمشنر ٹوپی ڈاکٹر یامین ثناء نے ٹی ایم اے، پولیس ،ٹریفک پولیس، تحصیل ایڈمنسٹریشن  اور سول ڈیفنس کے ہمراہ ٹوپی بازار کا اچانک دورہ کیا۔ اس دوران مختلف ہوٹلوں، بیکریوں اور اشیائے خورد و نوش کی دکانوں کا تفصیلی معائنہ کیا گیا، جبکہ روٹی کے وزن اور سرکاری نرخ ناموں پر بھی سختی سے عملدرآمد کا جائزہ لیا گیا۔معائنے کے دوران متعدد دکانداروں کو قوانین کی خلاف ورزی، صفائی کے ناقص انتظامات اور سرکاری نرخ ناموں پر عمل نہ کرنے پر وارننگ دی گئی، جبکہ خلاف قانون کاروبار کرنے والوں پر جرمانے بھی عائد کیے گئے۔اس موقع پر میڈیا سے گفتگو کرتے ہوئے ڈاکٹر یامین ثناء نے کہا کہ سرکاری نرخ نامے سے زائد قیمت وصول کرنے والوں کے خلاف بلاامتیاز کارروائی جاری رہے گی۔ حکومت کی رٹ کو کسی صورت چیلنج نہیں کرنے دیا جائے گا۔انہوں نے تاجر برادری پر زور دیا کہ وہ قوانین پر عمل درآمد کو یقینی بنائیں اور انتظامیہ کو کارروائی پر مجبور نہ کریں۔ ان کا کہنا تھا کہ عوامی مفاد اور صارفین (Consumers) کے حقوق کا ہر قیمت پر تحفظ یقینی بنایا جائے گا، جبکہ ذخیرہ اندوزی، ناجائز منافع خوری اور دیگر خلاف ورزیوں کے خلاف سخت کارروائیاں آئندہ بھی جاری رہیں گی۔