نواب شاہ (رپورٹ نفیس آرائیں):
ڈسٹرکٹ الیکشن کمشنر شہید بینظیرآباد محمد یوسف مجیدانو کی زیر صدارت ڈسٹرکٹ ووٹر ایجوکیشن کمیٹی کا اجلاس آج ان کے دفتر میں منعقد ہوا۔اجلاس میں ووٹر رجسٹریشن سے متعلق آگاہی مہم کو مزید مؤثر بنانے، نادرا پاک آئی ڈی کے استعمال اور اس کے فوائد سے عوام کو آگاہ کرنے کے لیے نادرا اور ضلعی الیکشن آفس کے باہمی تعاون سے ضلع کی مختلف یونین کونسلوں، اسکولوں اور دیگر تعلیمی اداروں میں آگاہی سیمینار اور سیشنز منعقد کرنے کا فیصلہ کیا گیا، تاکہ زیادہ سے زیادہ افراد تک درست معلومات پہنچ سکیں اور وہ پاک آئی ڈی کی سہولیات سے بھرپور استفادہ کر سکیں۔اجلاس کے دوران تجویز دی گئی کہ یونین کونسلوں اور اسکولوں میں اساتذہ کے ذریعے آگاہی مہم چلائی جائے تاکہ یہ معلومات اسکول کے بچوں کے ذریعے ان کے والدین، دیہات اور گرد و نواح میں رہنے والے افراد تک مؤثر انداز میں پہنچ سکیں۔اجلاس میں یہ بھی فیصلہ کیا گیا کہ ہر ہفتے ایک دن پاک آئی ڈی، رجسٹریشن کے طریقہ کار اور اس سے متعلق سہولیات کے بارے میں معلومات یونین کونسل کی سطح تک پہنچائی جائیں گی، تاکہ شہری آسانی سے جدید ڈیجیٹل سہولیات سے فائدہ اٹھا سکیں۔اجلاس میں زونل انچارج نادرا رفیق احمد بلر، ضلعی محکمہ تعلیم، محکمہ پاپولیشن ویلفیئر، محکمہ صحت کے نمائندوں سمیت دیگر متعلقہ افسران نے بھی شرکت کی اور آگاہی مہم کو کامیاب بنانے کے لیے ہر ممکن تعاون کی یقین دہانی کرائی۔