خون کا عطیہ انسانیت کی عظیم خدمت ہے، صحت مند افراد باقاعدگی سے خون عطیہ کریں: کمشنر شہید بینظیرآباد

نواب شاہ (رپورٹ نفیس آرائیں) ریجنل بلڈ سینٹر شہید بینظیرآباد کے زیر اہتمام عالمی یومِ خون عطیہ کے حوالے سے ڈونر ہال، ریجنل بلڈ سینٹر سکرنڈ روڈ نواب شاہ میں تقریب منعقد کی گئی، جس میں کمشنر شہید بینظیرآباد شہمیر خان بھٹو نے بطور مہمانِ خصوصی شرکت کی۔تقریب سے خطاب کرتے ہوئے کمشنر شہمیر خان بھٹو اور دیگر مقررین نے کہا کہ خون کا عطیہ کئی قیمتی انسانی جانیں بچانے کا ذریعہ بنتا ہے، اس لیے صحت مند افراد کو رضاکارانہ طور پر خون عطیہ کرنے کے عمل کو فروغ دینا چاہیے تاکہ تھیلیسیمیا، حادثات اور ہنگامی حالات میں مریضوں کو بروقت خون فراہم کیا جا سکے۔مقررین نے ریجنل بلڈ سینٹر، فاطمید فاؤنڈیشن، رضاکار خون عطیہ دہندگان اور معاون اداروں کی خدمات کو سراہتے ہوئے نوجوانوں اور سماجی تنظیموں پر زور دیا کہ وہ خون عطیہ مہمات میں بھرپور کردار ادا کریں۔