بلوچستان رحمت اللہ بلوچ بیوروچیف بے نقاب نیوز نیٹورک)
جمعیت علماء اسلام کے مرکزی رہنما اور رکن صوبائی اسمبلی نوابزادہ میر ظفراللہ خان زہری نے وزیراعلیٰ بلوچستان میر سرفراز بگٹی سے ان کے دفتر میں اہم ملاقات کی، جس میں ضلع سوراب، اور دیگر پسماندہ علاقوں کی ترقی، جاری و مجوزہ ترقیاتی منصوبوں، عوامی مسائل اور صوبائی بجٹ کے حوالے سے سیر حاصل گفتگو کی گئی۔ملاقات کے دوران نوابزادہ میر ظفراللہ خان زہری نے اپنے حلقہ انتخاب کے عوام کو درپیش بنیادی مسائل، سڑکوں، تعلیم، صحت، آبنوشی، زراعت اور روزگار کے مواقع سے متعلق تفصیلی سفارشات وزیراعلیٰ بلوچستان کے سامنے پیش کیں۔ انہوں نے زور دیا کہ صوبائی بجٹ میں پسماندہ اور نظرانداز شدہ علاقوں کے لیے خصوصی فنڈز مختص کیے جائیں تاکہ ترقی کا عمل نچلی سطح تک پہنچ سکے۔وزیراعلیٰ بلوچستان میر سرفراز بگٹی نے نوابزادہ میر ظفراللہ خان زہری کی تجاویز کو انتہائی اہم قرار دیتے ہوئے یقین دہانی کرائی کہ عوامی فلاح و بہبود اور علاقائی ترقی حکومت کی اولین ترجیحات میں شامل ہے اور بجٹ سازی میں عوامی نمائندوں کی آراء کو خصوصی اہمیت دی جائے گی۔سیاسی حلقوں کے مطابق یہ ملاقات بلوچستان کی آئندہ سیاسی اور ترقیاتی حکمت عملی کے تناظر میں نہایت اہمیت کی حامل ہے۔ مبصرین کا کہنا ہے کہ نوابزادہ میر ظفراللہ خان زہری نے ایک بار پھر اپنے حلقے کے عوام کی بھرپور نمائندگی کرتے ہوئے ترقیاتی منصوبوں اور عوامی حقوق کے لیے مؤثر آواز بلند کی ہے، جبکہ وزیراعلیٰ بلوچستان کے ساتھ ان کی ملاقات کو صوبے میں سیاسی ہم آہنگی اور تعمیری سیاست کی جانب ایک مثبت پیش رفت قرار دیا جا رہا ہے۔نوابزادہ میر ظفراللہ خان زہری نے اس عزم کا اظہار کیا کہ وہ اپنے عوام کے حقوق، علاقائی ترقی اور بلوچستان کی خوشحالی کے لیے ہر فورم پر بھرپور کردار ادا کرتے رہیں گے اور عوام کے اعتماد پر پورا اترنے کے لیے اپنی جدوجہد جاری رکھیں گے۔