اوتھل صابر حسین مگسی نمائندہ بے نقاب نیوز نیٹورک)
بیلہ پولیس نے کرایہ داری ایکٹ کی خلاف ورزی کرنے والوں کے خلاف کارروائی کرتے ہوئے ایک کرایہ دار کو گرفتار جبکہ مالک مکان کے خلاف مقدمہ درج کر لیا۔پولیس کے مطابق ایس ایچ او بیلہ یار محمد کمانڈو کی نگرانی میں پاور ہاؤس کالونی بیلہ میں کارروائی کے دوران معلوم ہوا کہ مکان کرایہ پر دینے کے باوجود کرایہ داری ایکٹ کے تحت لازمی رجسٹریشن اور دیگر قانونی تقاضے پورے نہیں کیے گئے تھے، جس پر قانونی کارروائی عمل میں لائی گئی۔پولیس نے مقدمہ نمبر 35/2026 بلوچستان کرایہ داری ایکٹ کے تحت درج کرتے ہوئے کرایہ دار ہارون اقبال ولد عبداللطیف (قوم قریشی، سکنہ کراچی) کو گرفتار کر لیا، جبکہ مالک مکان وسیم ولد گلاب (قوم بلوچ، سکنہ کراچی) کو بھی مقدمے میں نامزد کر دیا گیا۔اس موقع پر ایس ایس پی لسبیلہ نجیب اللہ پندرانی نے ضلع بھر کے تمام مکان و دکان مالکان کو ہدایت کی کہ وہ اپنے کرایہ داروں کے مکمل کوائف، شناختی دستاویزات اور کرایہ نامے کی نقول فوری طور پر متعلقہ تھانوں میں جمع کروائیں اور کرایہ داری ایکٹ کے تمام قانونی تقاضوں پر سختی سے عمل کریں۔انہوں نے خبردار کیا کہ قانون کی خلاف ورزی کرنے والوں کے خلاف بلاامتیاز کارروائی جاری رہے گی، جبکہ ضلع میں امن و امان کے قیام اور جرائم کی روک تھام کے لیے پولیس اپنی کارروائیاں مزید مؤثر انداز میں جاری رکھے گی۔