چکوال (جلیل نقوی)
قصبہ بھگوال اور ملحقہ تقریباً ڈیڈھ درجن دیہات کے رہائشیوں نے حکومت پنجاب اور ضلعی انتظامیہ سے مطالبہ کیا ہے کہ بھگوال میں ریسکیو 1122 کا پوائنٹ قائم کیا جائے تاکہ حادثات اور دیگر ہنگامی حالات میں عوام کو فوری امداد فراہم کی جا سکے۔ مکینوں کا کہنا ہے کہ بھگوال ایک مصروف قصبہ ہے جہاں روزانہ سینکڑوں افراد کا آنا جانا رہتا ہے۔ اس کے علاوہ بھگوال کے گردونواح میں واقع تقریباً ڈیڈھ درجن دیہات بھی اسی قصبے پر انحصار کرتے ہیں۔ سڑک حادثات، اچانک طبی ایمرجنسی یا دیگر واقعات کی صورت میں ریسکیو عملے کے پہنچنے میں تاخیر ہو جاتی ہے جس سے مشکلات میں اضافہ ہو جاتا ہے۔ اگر بھگوال میں ریسکیو 1122 کا پوائنٹ قائم کر دیا جائے تو نہ صرف قصبہ بھگوال بلکہ اردگرد کے علاقوں کے لوگوں کو بھی فائدہ پہنچے گا اور ہنگامی صورتحال میں امدادی کارروائیاں زیادہ تیزی سے ممکن ہو سکیں گی۔