نواب شاہ (رپورٹ: نفیس آرائیں)
ڈپٹی کمشنر شہید بینظیرآباد عبدالصمد نظامانی کی زیرِ صدارت محرم الحرام کے انتظامات کے سلسلے میں ایک اہم اجلاس ڈی سی آفس کے دربار ہال میں منعقد ہوا۔ اجلاس میں میئر میونسپل کارپوریشن قاضی محمد رشید بھٹی، ڈپٹی میئر چوہدری مبشر آرائیں، ایس ایس پی شہید بینظیرآباد سمیر نور چنہ سمیت متعلقہ محکموں کے افسران نے شرکت کی۔اجلاس میں امن و امان، صفائی ستھرائی، بجلی، پانی، صحت اور دیگر شہری سہولیات سے متعلق انتظامات کا تفصیلی جائزہ لیا گیا۔ڈپٹی کمشنر عبدالصمد نظامانی نے ہدایت کی کہ محرم الحرام کے دوران سوشل میڈیا پر نفرت انگیز مواد شیئر کرنے اور فرقہ وارانہ ہم آہنگی کو نقصان پہنچانے والے عناصر کے خلاف سخت کریک ڈاؤن کیا جائے اور ان کے خلاف مقدمات درج کیے جائیں۔ انہوں نے متعلقہ اداروں کو جلوسوں اور مجالس کے راستوں پر صفائی، روشنی، پینے کے پانی اور سیکیورٹی کے فول پروف انتظامات یقینی بنانے کی ہدایت بھی کی۔اس موقع پر ایس ایس پی شہید بینظیرآباد سمیر نور چنہ نے بتایا کہ ضلع بھر میں محرم الحرام کے دوران 319 مجالس، 59 ماتمی جلوس اور 39 تعزیے برآمد ہوں گے، جن کی سیکیورٹی کے لیے 3,347 پولیس اہلکار تعینات کیے جائیں گے۔ انہوں نے علماء کرام اور مذہبی رہنماؤں پر زور دیا کہ وہ امن و امان کے قیام کے لیے انتظامیہ اور پولیس کے ساتھ مکمل تعاون کریں۔میئر میونسپل کارپوریشن قاضی محمد رشید بھٹی نے یقین دہانی کرائی کہ جلوسوں کے راستوں، امام بارگاہوں اور مساجد کے اطراف صفائی ستھرائی اور پینے کے صاف پانی کی فراہمی کے مؤثر انتظامات کیے جائیں گے۔اجلاس میں مذہبی رہنماؤں، ضلعی افسران، پولیس، رینجرز، حیسکو، محکمہ صحت، لوکل گورنمنٹ اور دیگر متعلقہ اداروں کے نمائندوں نے شرکت کی اور محرم الحرام کے پرامن انعقاد کے لیے مکمل تعاون کی یقین دہانی کرائی۔