میاں چنوں:بینقاب نیوز عاصم کمال
تحصیل ہیڈکوارٹر ہسپتال میاں چنوں کے میڈیکل سپرنٹنڈنٹ ڈاکٹر آصف محمود چوہدری نے کہا ہے کہ ہسپتال میں صرف مریضوں کے مفاد کو ترجیح دی جائے گی جبکہ جعلی میڈیکل سرٹیفکیٹس کے اجرا اور فرائض میں غفلت برتنے والے ملازمین کے خلاف سخت کارروائی عمل میں لائی جائے گی۔
انہوں نے یہ بات ذرائع ابلاغ کے نمائندوں اور انجمن تاجران کے عہدیداران سے تعارفی ملاقات کے دوران کہی۔ اس موقع پر ہسپتال کے انتظامی امور، طبی سہولیات اور سروس ڈلیوری کے معیار کو بہتر بنانے کے حوالے سے تبادلہ خیال کیا گیا جبکہ شرکاء نے اپنی تجاویز اور آراء بھی پیش کیں۔
ڈاکٹر آصف محمود چوہدری نے کہا کہ ہسپتال میں جعلی میڈیکل سرٹیفکیٹس کے اجرا کی ہرگز اجازت نہیں دی جائے گی اور اس حوالے سے زیرو ٹالرنس پالیسی اپنائی گئی ہے۔ انہوں نے شہریوں سے اپیل کی کہ نزلہ، زکام، کھانسی اور بخار جیسے معمولی امراض کی صورت میں ایمرجنسی کے بجائے او پی ڈی سے رجوع کریں تاکہ ایمرجنسی میں آنے والے تشویشناک مریضوں کو بروقت طبی امداد فراہم کی جا سکے۔