سکھر ( رپورٹ/عبد الرحمان راجپوت )
آل پاکستان کلرکس ایسوسی ایشن (ایپکا) ضلع سکھر کی جانب سے ملازمین کے مطالبات منظور نہ کیے جانے اور بڑھتی ہوئی مہنگائی کے خلاف بھرپور احتجاجی مظاہرہ کیا گیا۔ پاپولیشن ڈپارٹمنٹ سکھر کے سیکڑوں مرد و خواتین ملازمین نے محمد بن قاسم پارک سے سکھر پریس کلب تک احتجاجی ریلی نکالی اور پریس کلب کے سامنے دھرنا دے کر شدید نعرے بازی کی۔احتجاجی مظاہرے اور ریلی کی قیادت ایپکا سندھ کے صوبائی صدر مقبول حسین مہر کر رہے تھے، جبکہ دیگر رہنماؤں میں علی مردان شیخ، محمد پناہ مہر، عبدالمجید جسکانی (صدر آل پاکستان ورکرز فیڈریشن سکھر ڈویژن)، محمد علی، اشرف خان جتوئی، پناہ سومرو، میڈم آسیہ بیگم، شاہد حسین بھٹو، ریاض حسین شاہ، محمد حنیف چاچڑ، نثار احمد میمن اور دیگر شامل تھے۔اس موقع پر خطاب کرتے ہوئے رہنماؤں نے کہا کہ ملک میں مہنگائی کا طوفان برپا ہے اور سرکاری ملازمین شدید معاشی مشکلات کا شکار ہیں۔روزمرہ استعمال کی اشیاء کی قیمتوں میں بے پناہ اضافے کے باعث موجودہ تنخواہیں ملازمین اور ان کے خاندانوں کی بنیادی ضروریات پوری کرنے کے لیے ناکافی ہو چکی ہیں۔انہوں نے وفاقی اور صوبائی حکومت سے مطالبہ کیا کہ آئندہ بجٹ میں سرکاری ملازمین کی تنخواہوں میں کم از کم 200 فیصد اضافہ کیا جائے تاکہ وہ مہنگائی کے اثرات کا مقابلہ کر سکیں۔رہنماؤں نے مزید مطالبہ کیا کہ ملازمین کے سروس اسکیلز کو اپ گریڈ کیا جائے اور انہیں ٹائم اسکیل کی سہولت فراہم کی جائے تاکہ مختلف محکموں کے ملازمین کو ترقی کے یکساں مواقع میسر آ سکیں۔ انہوں نے کہا کہ برسوں سے خدمات انجام دینے والے کنٹریکٹ اور کچے ملازمین کو فوری طور پر مستقل کیا جائے تاکہ ان کے روزگار کو تحفظ حاصل ہو اور وہ ذہنی سکون کے ساتھ اپنے فرائض انجام دے سکیں۔