ضلع خیرپور
ہنگورجا: رپورٹ فیاض محسن سولنگی
ہنگورجا کے قریب رسول آباد بس اسٹاپ کے رہائشی محنت کش بزرگ رانو ولد غلام نبی سولنگی نے اپنے نافرمان بیٹے رمضان کے مبینہ طور پر بری صحبت اختیار کرنے کے خلاف سٹی پریس کلب ہنگورجا میں صحافیوں کے سامنے احتجاج کرتے ہوئے کہا کہ ان کا بیٹا چوروں اور آوارہ افراد کی صحبت میں پڑ گیا ہے۔
جب انہوں نے اپنے بیٹے کو ایسی صحبت سے منع کیا تو اس نے نہ صرف انہیں بلکہ اپنے دیگر بھائیوں کو بھی مارنے پیٹنے اور سنگین نتائج کی دھمکیاں دیں۔ ان کا کہنا تھا کہ ان کا بیٹا علاقے کے مبینہ منشیات فروشوں اور جرائم پیشہ افراد کے ساتھ رہنے لگا ہے، جس کی وجہ سے ہنگورجا اور دیگر علاقوں کی پولیس بلاوجہ انہیں اور ان کے محنت کش بیٹوں کو تنگ کرتی ہے، جس سے وہ شدید ذہنی پریشانی کا شکار ہیں۔
اگر کوئی شخص ان کے بیٹے رمضان کے ساتھ کسی قسم کا لین دین یا معاملہ کرتا ہے تو اس کا ذمہ دار وہ خود ہوگا۔ انہوں نے روتے ہوئے کہا کہ آج کے بعد ان کا اور ان کے دیگر بیٹوں کا رمضان کے ساتھ کوئی تعلق یا واسطہ نہیں رہا۔ انہوں نے اپنے بیٹے کو اپنی زندگی اور جائیداد سے لاتعلق (لا دعویٰ) قرار دیتے ہوئے کہا کہ اس کے اچھے یا برے اعمال کا ذمہ دار وہ خود ہوگا۔
آخر میں انہوں نے ایس ایس پی خیرپور، ایس ایچ او ہنگورجا اور دیگر متعلقہ حکام سے اپیل کی کہ ان کا یہ احتجاج قانونی ریکارڈ کا حصہ بنایا جائے۔