جیکب آباد رپورٹ: مجیب کھوسو
جیکب آباد کے قریب آباد تھانے کی حدود گاؤں علی نواز جکھرانی میں ایک خاتون کی پراسرار ہلاکت کا واقعہ پیش آیا، جہاں مسمات زرینہ دختر عبدالرحیم جکھرانی مبینہ طور پر زہر دیے جانے کے باعث جاں بحق ہوگئی۔ واقعے کے بعد علاقے میں تشویش کی لہر دوڑ گئی۔ذرائع کے مطابق متوفیہ خاتون کے بھائی محمد موسیٰ جکھرانی نے الزام عائد کیا ہے کہ اس کی بہن کو اس کے شوہر محمد قاسم جکھرانی اور سسر محمد حسن جکھرانی نے مبینہ طور پر زہر دے کر قتل کیا ہے۔ انہوں نے مطالبہ کیا کہ واقعے کی غیرجانبدارانہ تحقیقات کرکے ذمہ دار افراد کے خلاف قانونی کارروائی کی جائے۔
واقعے کی اطلاع ملتے ہی پولیس موقع پر پہنچ گئی اور لاش کو ضروری قانونی ڪارروائی اور پوسٹ مارٹم کے لیے اسپتال منتقل کردیا گیا۔ پولیس کا کہنا ہے کہ واقعے کے مختلف پہلوؤں سے تحقیقات کی جارہی ہیں اور حقائق سامنے آنے کے بعد مزید کارروائی عمل میں لائی جائے گی۔