سیالکوٹ:بچے دو دن سے بھوکے، حالات سے مایوس  شخص کی موت کوگلے لگانے کی کوشش

سیالکوٹ (سلیم احمد اعوان شیخو) ہیڈ مرالہ بیراج پر ایک دل دہلا دینے والا واقعہ پیش آیا یہاں 45 سالہ اکبر علی نے حالات سے مایوس ہو کر بیراج سے نیچے چھلانگ لگا دی۔ بیراج پر موجود مقامی لوگوں نے فوری طور پر اپنی مدد آپ’کے تحت ریسکیو کر کے اکبر علی کی جان بچائی۔جب اکبر علی سے اس انتہائی قدم کی وجہ پوچھی گئی تو اس کی داستان سن کر ہر آنکھ اشکبار ہو گئی۔اکبر علی کے بقول اس کے چار معصوم بچے ہیں کرایہ کے مکان میں رہتا ہے جبکہ اس ماہ بجلی کا بل 22 ہزار روپے آگیا ہے اور گھر میں آٹا خریدنے تک کے پیسے نہیں ہیں۔ بچے دو دن سے بھوکے تھے میں ان کی یہ حالت دیکھ کر برداشت نہ کر سکا اور اپنی زندگی ختم کرنے چلا تھا۔اس افسوسناک واقعے کی اطلاع ملتے ہی ‘بجوات سیکٹر سیالکوٹ آفیشل پیج’ کی ٹیم نے فوری طور پر اکبر علی سے رابطہ کیا اور انہیں ایک ماہ کا مکمل راشن فراہم کیا۔ نہ صرف یہ، بلکہ ٹیم نے انہیں یقین دلایا ہے کہ انشا اللہ آئندہ بھی ان کی ہر ممکن مدد جاری رکھی جائے گی۔ اس کاوش پر اکبر علی کے چہرے پر مسکراہٹ اور دل کو سکون ملا۔