صحافی ڈاکٹر راحیل شہزاد راٹھور پرحملہ قابل مزمت،آزادی صحافت پر حملہ کسی بھی صورت برداشت نہیں کیا جائے گا:ریجنل یونین آف جرنلسٹس شہید بینظیرآباد

نواب شاہ (رپورٹ: نفیس آرائیں)ریجنل یونین آف جرنلسٹس شہید بینظیرآباد نے صحافی ڈاکٹر راحیل شہزاد راٹھور پر ہونے والے حملے کی شدید الفاظ میں مذمت کرتے ہوئے کہا ہے کہ آزادی صحافت پر حملہ کسی بھی صورت برداشت نہیں کیا جائے گا، صحافیوں کو فرائضِ منصبی کی ادائیگی سے روکنے کی ہر کوشش قابلِ مذمت ہے۔تفصیلات کے مطابق نواب شاہ کے رہائشی علاقے کیمپ نمبر 2 میں ایک نجی اسکول کی عمارت کی تعمیر کے دوران اہلِ علاقہ نے اسکول انتظامیہ کو آگاہ کیا کہ مذکورہ علاقہ رہائشی زون میں آتا ہے، جبکہ سندھ ہائی کورٹ کراچی بھی اپنے حکم نامہCP D-133 of 2022 and connected mattersمورخہ 15 جنوری 2025 میں رہائشی علاقوں میں اس نوعیت کے تعلیمی ادارے قائم کرنے سے متعلق واضح احکامات جاری کر چکی ہے۔اہلِ علاقہ اور اسکول مالکان کے درمیان اسی معاملے پر تلخ کلامی کے بعد کشیدگی پیدا ہوگئی، جو بعد ازاں جھگڑے کی صورت اختیار کر گئی۔ اس تمام صورتحال کی کوریج پاکستان کے معتبر ٹی وی چینل اے جی این نیوز اور معروف سوشل میڈیا پلیٹ فارم اردو پوائنٹ کے اینکر ڈاکٹر راحیل شہزاد راٹھور کر رہے تھے کہ اسی دوران مبینہ طور پر اسکول مالکان کی جانب سے ان پر حملہ کیا گیا۔ذرائع کے مطابق حملہ آوروں نے ڈاکٹر راحیل شہزاد راٹھور کو سنگین نتائج کی دھمکیاں دیتے ہوئے کوریج سے روکنے کی کوشش کی اور ان کا موبائل فون چھیننے کی بھی کوشش کی گئی۔ دورانِ مزاحمت موبائل فون سڑک پر گر کر ٹوٹ گیا۔واقعے کے بعد صحافتی، سماجی اور سول سوسائٹی کے حلقوں میں شدید تشویش کی لہر دوڑ گئی، جبکہ ریجنل یونین آف جرنلسٹس شہید بینظیرآباد سمیت مختلف صحافتی تنظیموں نے واقعے کی سخت مذمت کرتے ہوئے ذمہ داران کے خلاف فوری قانونی کارروائی اور صحافیوں کو تحفظ فراہم کرنے کا مطالبہ کیا ہے۔