نواب شاہ (رپورٹ: نفیس آرائیں)
ڈی آئی جی شہید بینظیر آباد رینج فیصل بشیر میمن نے ایس ایس پی نوشہرو فیروز کے ہمراہ ضلع نوشہرو فیروز کی تحصیل کنڈیارو کا دورہ کیا، جہاں انہوں نے زیرِ تعمیر ماڈل پولیس تھانے کا تفصیلی معائنہ کیا۔دورے کے موقع پر متعلقہ افسران کی جانب سے ڈی آئی جی کو تعمیراتی پیش رفت، سیکیورٹی انتظامات اور جاری ترقیاتی امور کے حوالے سے جامع بریفنگ دی گئی۔ اس موقع پر ڈی آئی جی فیصل بشیر میمن نے تعمیراتی معیار، رفتارِ کار اور عوامی سہولیات کا باریک بینی سے جائزہ لیتے ہوئے متعلقہ حکام کو ہدایات جاری کیں کہ منصوبے کو مقررہ مدت میں اعلیٰ معیار کے مطابق مکمل کیا جائے تاکہ شہریوں کو جدید اور بہتر پولیس سہولیات کی فراہمی یقینی بنائی جا سکے۔ڈی آئی جی شہید بینظیر آباد رینج فیصل بشیر میمن کا کہنا تھا کہ جدید تقاضوں سے ہم آہنگ ماڈل پولیس تھانے عوام دوست ماحول اور مؤثر پولیسنگ کے فروغ میں کلیدی کردار ادا کریں گے۔ انہوں نے اس امر پر بھی زور دیا کہ تعمیراتی کام میں شفافیت، معیار اور پائیداری کو ہر صورت مقدم رکھا جائے۔انہوں نے متعلقہ افسران کو ہدایت کی کہ منصوبے کی تکمیل میں کسی قسم کی غفلت یا کوتاہی برداشت نہیں کی جائے گی، جبکہ عوامی سہولیات کو مدنظر رکھتے ہوئے تمام انتظامات بروقت مکمل کیے جائیں۔دورے کے دوران پولیس افسران، متعلقہ انجینئرنگ عملہ اور دیگر حکام بھی ان کے ہمراہ موجود تھے۔