انتخابات میں بی جے پی کی متنازع جیت ،بنگال میں فسادات پھوٹ پڑے، 100 نشستوں پر ہیرا پھیری ہوئی ، راہل گاندھی ،ممتا

    بھارت میں انتخابات میں بی جےپی کی متنازع جیت کے بعد فسادات پھوٹ پڑے، جگہ جگہ آتشزنی، توڑ پھوڑ، بنگال میں سی آر پی طلب،100 سے زائد نشستوں پر ہیرا پھیری ہوئی راہل گاندھی، ممتا بینر جی پر تشدد ، سابق وزیراعلیٰ آج پریس کانفرنس کریں گی۔

    بھارت میں مغربی بنگال اسمبلی انتخابات کے نتائج کے بعد، بیربھوم ضلع کے کئی علاقوں میں آتش زنی اور توڑ پھوڑ کے واقعات پیش آئے۔ ٹی ایم سی نے آتشزنی اور توڑ پھوڑ کا الزام بی جے پی پر عائد کیا ہے۔ وہیں بی جے پی کی طرف سے تاحال کوئی ردعمل سامنے نہیں آیا ہے۔
    اہل گاندھی نے کہا ہے کہ بی جے پی نے الیکشن کمیشن کی مدد سے بنگال اور آسام میں انتخابات چرائے۔راہل گاندھی نے الزام لگایا کہ بھارتیہ جنتا پارٹی (بی جے پی) نے الیکشن کمیشن کی مدد سے مغربی بنگال اور آسام میں انتخابات کو چرایا ہے۔
    انہوں نے مغربی بنگال کی وزیر اعلیٰ ممتا بنرجی کے اس دعوے کی حمایت کی کہ مغربی بنگال میں 100 سیٹیں چوری ہوئی ہیں۔ گاندھی نے ایکس پر لکھا، "بی جے پی کے آسام اور بنگال میں الیکشن کمیشن کی مدد سے الیکشن چوری کرنے کے معاملے واضح ہیں۔ ہم ممتا جی سے متفق ہیں۔ بنگال میں 100 سے زیادہ سیٹیں چوری کی گئیں۔”
    کانگریس کے سابق صدر راہل گاندھی نے کہا کہ ہم نے یہ حربہ پہلے بھی دیکھا ہے۔ کانگریس لیڈر نے دعویٰ کیا کہ یہ مدھیہ پردیش، ہریانہ اور مہاراشٹر کے اسمبلی انتخابات کے ساتھ ساتھ گزشتہ لوک سبھا انتخابات میں بھی دیکھا گیا تھا۔ انہوں نے کہا کہ الیکشن چوری، اداروں کی چوری، اب اور کیا کرنا ہے؟


    وزیر اعلیٰ ممتا بنرجی نے پیر کو بنگال کے انتخابات میں ان کی سیکورٹی کے لیے تعینات سینٹرل آرمڈ پولیس فورس (سی اے پی ایف) پر حملہ کرنے کا سنگین الزام لگایا ہے۔ ’اے بی پی نیوز‘ سے بات کرتے ہوئے ممتا بنرجی نے کہا کہ آپ سنٹرل ریزرو پولیس فورس (سی آر پی ایف) کو دیکھ سکتے ہیں۔ انہوں نے مجھے دھکا دیا اور مارا۔ ’’بی جے پی راکشسوں کی پارٹی ہے، اس نے 100 سے زیادہ سیٹیں لوٹی ہیں اور دھوکہ دیا۔ الیکشن کمیشن بی جے پی کا کمیشن ہے۔ میں نے سی ای او منوج اگروال سے بھی شکایت کی لیکن وہ کچھ نہیں کر رہے ہیں۔ کیا آپ کو لگتا ہے کہ یہ جیت ہے؟ یہ ایک غیر اخلاقی جیت ہے، اخلاقی نہیں ہے۔‘‘ انہوں نے مزید کہا کہ  ’’الیکشن کمیشن نے مرکزی فورسز، وزیراعظم اور وزیر داخلہ کے ساتھ مل کر جو کچھ بھی کیا ہے، وہ پوری طرح سے غیر قانونی ہے۔ یہ لوٹ ہے، لوٹ اور صرف لوٹ ہے، ہم واپسی کریں گے۔‘‘

    واضح رہے کہ بی جے پی امیدواروں نے بیربھوم ضلع کی 11 اسمبلی سیٹوں میں سے چھ پر کامیابی حاصل کی ہے۔ پانچ بار کے ایم ایل اے آشیش بنرجی اور دو دیگر موجودہ پارٹی امیدواروں سمیت کئی اہم شخصیات کو شکست کا سامنا کرنا پڑا۔ انتخابی نتائج سامنے آنے کے فوراً بعد ضلع کے مختلف حصوں میں تشدد پھوٹ پڑا۔
    بولپور میں گنتی مرکز کے قریب ترنمول کانگریس کے کیمپ آفس میں مبینہ طور پر توڑ پھوڑ کی گئی۔ کرناہار میں ترنمول کے ایک کارکن کی دکان کو مبینہ طور پر آگ لگا دی گئی۔ انتظامیہ کو نیچو پٹی میں انبرتا منڈل کے گھر کے سامنے مرکزی سکیورٹی فورسز تعینات کرنی پڑی۔

    Related Posts