شہدادپور (رپورٹ عمران قمر )
شائننگ اسٹارز سوسائٹی کے زیرِ اہتمام بچوں میں مطالعے کا شوق بیدار کرنے کے لیے شروع کی گئی "کتاب دوستی مہم” اپنے تمام تر تعلیمی مقاصد حاصل کرنے کے بعد اختتام پذیر ہو گئی۔ مہم کے آخری مرحلے میں طلبہ کے لیے معلوماتی اور تفریحی سرگرمیوں کا انعقاد کیا گیا۔مہم کے دوران بچوں کو شاہ لطیف لائبریری کا دورہ کرایا گیا، جہاں انہوں نے لائبریری سے اپنی پسند کی کتب حاصل کیں اور اجتماعی مطالعہ کیا۔ اس موقع پر بچوں کو مستقل بنیادوں پر کتابوں سے جوڑنے کے لیے ان میں لائبریری کارڈز بھی تقسیم کیے گئے۔کتاب دوستی مہم کی مرکزی تقریب مین سندھی پرائمری اسکول میں منعقد ہوئی، جس سے ریجنل ایجوکیشن آفیسر حافظ سلمان خالد، سینئر ایڈمنسٹریٹر مس صائمہ میمن اور وائس پرنسپل رسول بخش ڈیتھو نے خطاب کیا۔ مقررین نے شائننگ اسٹارز سوسائٹی کی اس کاوش کو سراہتے ہوئے کہا کہ ڈیجیٹل دور میں بچوں کو کتاب کی طرف واپس لانا ایک عظیم مشن ہے۔ انہوں نے مزید کہا کہ ایسی سرگرمیاں طلبہ کی اخلاقی اور علمی تربیت میں ریڑھ کی ہڈی کی حیثیت رکھتی ہیں۔پروگرام کے اختتام پر مہم میں بھرپور شرکت کرنے والے بچوں کی حوصلہ افزائی کے لیے ان میں نئے اسکول بیگز تقسیم کیے گئے۔ اس موقع پر شائننگ اسٹارز سوسائٹی کے صدر سبیل عباس، سیکریٹری اطلاعات غلام مصطفیٰ لغاری اور دیگر اراکین بھی موجود تھے۔ سوسائٹی کے عہدیداران نے عزم کا اظہار کیا کہ "کتاب دوستی مہم” کے بعد اب مزید نئے تعلیمی پراجیکٹس پر کام شروع کیا جائے گا۔
