جڑواں شہروں میں سیکورٹی ‘ہائی الرٹ’: نور خان ایئر بیس روڈ مکمل سیل، ٹرانسپورٹ معطل اور بڑے ہوٹل خالی کرانے کا حکم

اسلام آباد / راولپنڈی: وفاقی دارالحکومت اور راولپنڈی ۔ جڑواں شہروں کے داخلی اور خارجی راستوں پر پہرا سخت کر دیا گیا ہے، جبکہ انتہائی حساس علاقوں میں عوامی نقل و حرکت پر مکمل پابندی عائد کر دی گئی ہے۔
انتظامیہ کی جانب سے جاری کردہ ہنگامی احکامات کے مطابق، نور خان ایئر بیس روڈ (چکلالہ) پر واقع تمام دکانوں، دفاتر اور حتیٰ کہ گھروں کو بھی اگلے حکم تک مکمل طور پر بند رکھنے کی ہدایت کی گئی ہے۔

ضلعی انتظامیہ اسلام آباد/اہم اعلان

وفاقی دارالحکومت میں پبلک اور ہیوی ٹرانسپورٹ کے حوالے سے ضلعی انتظامیہ کا اہم اعلان، شہر میں ہیوی ٹرانسپورٹ اور پبلک ٹرانسپورٹ کو تاحکم ثانی معطل کیا جا رہا ہے، شہریوں سے التماس ہے کہ سیکورٹی اداروں کے ساتھ تعاون کریں, شکریہ

— DC Islamabad (@dcislamabad) April 19, 2026

سیکورٹی ذرائع کا کہنا ہے کہ یہ اقدامات کسی بھی ممکنہ خطرے کے پیشِ نظر اور حساس تنصیبات کی حفاظت کو یقینی بنانے کے لیے کیے گئے ہیں۔ڈپٹی کمشنر راولپنڈی نے سماجی رابطے کی ویب سائٹ پر جاری ایک بیان میں اعلان کیا ہے کہ:
"راولپنڈی میں تمام نجی، عوامی اور گڈز ٹرانسپورٹ کو فوری طور پر معطل کر دیا گیا ہے۔ شہری کسی بھی قسم کے سفر سے قبل تازہ ترین صورتحال سے آگاہ رہیں۔”

All private, public and goods transport in Rawalpindi is hereby suspended with immediate effect. Further updates will be shared.

راولپنڈی میں ہر قسم کی پرائیویٹ، پبلک اور گڈز ٹرانسپورٹ تا حکمِ ثانی معطل رہے گی۔
مزید معلومات سے بروقت آگاہ کیا جائے گا

— DC Rawalpindi (@DCRawalpindi) April 19, 2026

اسلام آباد کے دو بڑے ہوٹلوں، سرینا اور میریٹ میں غیر معمولی سرگرمیاں دیکھی جا رہی ہیں۔
انتظامیہ نے تمام دفاتر اور مہمانوں کو فوری طور پر پارکنگ اور بیسمنٹ خالی کرنے کا نوٹس جاری کر دیا ہے۔ ہوٹل کی جانب سے اسے "قومی کاز” اور "عالمی امن ڈائیلاگ” کا حصہ قرار دیا گیا ہے۔

نیپرا لین: قانون نافذ کرنے والے اداروں کی بھاری نفری تعینات کر دی گئی ہے اور نیپرا لین کو ہر قسم کی پیدل اور گاڑیوں کی آمد و رفت کے لیے بند کر دیا گیا ہے۔
پولیس اور دیگر قانون نافذ کرنے والے اداروں کی جانب سے جڑواں شہروں کے مختلف علاقوں میں گھر گھر تلاشی اور کومبنگ آپریشنز کا سلسلہ جاری ہے۔ مشتبہ افراد کی کڑی نگرانی کی جا رہی ہے اور اہم شاہراہوں پر جگہ جگہ ناکے لگا دیے گئے ہیں۔
انتظامیہ نے شہریوں کو ہدایت کی ہے کہ وہ غیر ضروری طور پر گھروں سے باہر نہ نکلیں اور حساس علاقوں کی طرف جانے سے گریز کریں۔ کسی بھی ہنگامی صورتحال میں قریبی سیکورٹی اہلکار یا ہیلپ لائن پر اطلاع دیں۔
تاہم باضابطہ طور پر ایران اور امریکا کے درمیان ممکنہ مذاکرات کی تصدیق نہیں کی گئی، لیکن یہ تیاریاں کسی بڑی عالمی پیش رفت کی طرف اشارہ کر رہی ہیں۔