جنرل قاسم سلیمانی کی بھتیجی اور نواسی گرفتار؛ گرین کارڈ منسوخ، یہ ہمارے رشتہ دار نہیں، زینب سلیمانی

واشنگٹن : امریکی وزارتِ خارجہ نے تصدیق کی ہے کہ ایرانی پاسدارانِ انقلاب کے مقتول کمانڈر جنرل قاسم سلیمانی کی بھتیجی حمیدہ سلیمانی افشار اور ان کی بیٹی کو امریکا میں گرفتار کر لیا گیا ہے۔ یہ کارروائی امریکی وزیرِ خارجہ مارکو روبیو کے خصوصی حکم پر عمل میں لائی گئی ہے۔جبکہ جنرل قاسم کی بیٹی زینب سلیمانی کا کہنا ہے کہ  ”امریکا میں گرفتار کیے گئے افراد کا شہید سلیمانی کے خاندان سے دور دور تک کوئی تعلق نہیں ہے۔ امریکی وزارتِ خارجہ کا یہ دعویٰ سراسر جھوٹ پر مبنی ہے۔“
سنیچر کو جاری ہونے والے ایک سرکاری بیان کے مطابق، وزیرِ خارجہ مارکو روبیو نے حمیدہ سلیمانی اور ان کی صاحبزادی کے امریکی رہائشی اجازت نامے (گرین کارڈ) فوری طور پر منسوخ کر دیے ہیں۔دونوں خواتین اس وقت امریکی امیگریشن اینڈ کسٹمز انفورسمنٹ (ICE) کی تحویل میں ہیں۔مارکو روبیو نے واضح کیا ہے کہ یہ خواتین اس وقت ملک سے بے دخلی (Deportation) کے عمل کے انتظار میں ہیں اور انہیں جلد ایران واپس بھیج دیا جائے گا۔
امریکی وزارتِ خارجہ نے حمیدہ سلیمانی پر سنگین الزامات عائد کیے ہیں۔ بیان میں کہا گیا ہے کہ وہ ایران کی موجودہ حکومت اور اس کے ”دہشت گردانہ“ اقدامات کی کھلم کھلا حامی ہیں۔انہوں نے اپنے سوشل میڈیا اکاؤنٹس کو ایرانی حکومت کے پروپیگنڈے کو فروغ دینے کے لیے استعمال کیا۔
مارکو روبیو کے مطابق، یہ خواتین امریکا میں گرین کارڈ پر عیش و آرام کی زندگی گزار رہی تھیں جبکہ ان کے خاندان کے روابط امریکہ مخالف سرگرمیوں سے رہے۔
رپورٹ کے مطابق حمیدہ سلیمانی کے شوہر پر بھی امریکہ میں داخلے پر مستقل پابندی عائد کر دی گئی ہے، تاہم سیکورٹی وجوہات کی بنا پر ان کی بیٹی اور شوہر کے نام ظاہر نہیں کیے گئے۔
دوسری طرف پاسدارانِ انقلاب کے سابق سربراہ جنرل قاسم سلیمانی کی صاحبزادی زینب سلیمانی نے امریکی محکمہ خارجہ کے اس دعوے کو قطعی طور پر مسترد کر دیا ہے جس میں کہا گیا تھا کہ امریکا میں ان کی قریبی رشتے داروں کو گرفتار کیا گیا ہے۔ ایرانی سرکاری میڈیا کے مطابق زینب سلیمانی نے ان خبروں کو من گھڑت اور بے بنیاد قرار دیا ہے۔
یاد رہے کہ جنرل قاسم سلیمانی، جنہیں ایران کا طاقتور ترین فوجی دماغ سمجھا جاتا تھا، 2020 میں بغداد ایئرپورٹ کے باہر ایک امریکی ڈرون حملے میں جاں بحق ہوئے تھے۔ یہ حملہ صدر ڈونلڈ ٹرمپ کے براہِ راست حکم پر کیا گیا تھا، جس کے بعد سے تہران اور واشنگٹن کے تعلقات انتہائی کشیدہ چلے آ رہے ہیں۔