لاہور : وزیراعلیٰ پنجاب مریم نواز نے صوبے کے عوام کے لیے ایک ایسے ’میگا ریلیف پیکج‘ کا اعلان کر دیا ہے جس نے مہنگائی کے مارے شہریوں کے چہروں پر مسکراہٹ بکھیر دی ہے۔ عالمی معاشی بحران اور جنگی حالات کے پیشِ نظر، پنجاب حکومت نے ٹرانسپورٹ، زراعت اور ایندھن کے شعبوں میں اربوں روپے کی سبسڈی دینے کا فیصلہ کیا ہے۔
اب سفر ہوگا بالکل مفت!
وزیراعلیٰ کے اعلان کے مطابق، پنجاب کے بڑے شہروں میں چلنے والی جدید سفری سہولیات اب عوام کے لیے مفت ہوں گی۔ اس سہولت میں درج ذیل سروسز شامل ہیں:
اورنج لائن میٹرو ٹرین
میٹرو بس سروس
سپیڈو بس سروس
گرین الیکٹرو بس
مہنگائی کی چکی میں پسنے والے موٹر سائیکل سواروں اور کسانوں کے لیے بھی مریم نواز نے بڑے اقدامات کیے ہیں:
پٹرول کی بڑھتی قیمتوں سے بچانے کے لیے موٹر سائیکل سواروں کو 20 لیٹر پٹرول پر 100 روپے رعایت فراہم کی جائے گی۔
زراعت کو سہارا دینے کے لیے کسانوں کو فی ایکڑ ڈیزل پر 100 روپے کی سبسڈی دی جائے گی، جبکہ کسانوں کے لیے نقد امداد کا عمل بھی شروع کیا جا رہا ہے۔
مریم نواز کا کہنا ہے کہ یہ ریلیف پیکج وزیراعظم شہباز شریف کے قومی بچت اور کفایت شعاری پروگرام کا حصہ ہے۔ انہوں نے واضح کیا کہ درآمدی تیل پر انحصار کی وجہ سے پاکستان معاشی دباؤ میں ہے، لیکن ان کی حکومت عوام کو اس مشکل گھڑی میں تنہا نہیں چھوڑے گی۔
”ہم اربوں روپے کا بوجھ خود اٹھا کر عوام کو ریلیف دے رہے ہیں۔ جیسے ہی حالات بہتر ہوں گے، معاشی بوجھ میں مزید کمی کی جائے گی،“ وزیراعلیٰ پنجاب نے عزم کا اظہار کیا۔