لاہور : پاکستان کرکٹ بورڈ نے ڈسپلن کی خلاف ورزی پر سخت موقف اپناتے ہوئے قومی ٹیم کے فاسٹ باؤلر نسیم شاہ پر دو کروڑ روپے کا بھاری جرمانہ عائد کر دیا ہے۔ یہ تادیبی کارروائی سوشل میڈیا پر ایک متنازع پیغام اپ لوڈ کرنے کے نتیجے میں عمل میں آئی ہے، جسے بورڈ نے کھلاڑیوں کے لیے وضع کردہ ضابطہ اخلاق اور سنٹرل کنٹریکٹ کی سنگین خلاف ورزی قرار دیا ہے۔
پی سی بی کی تین رکنی ڈسپلنری کمیٹی نے معاملے کی مکمل تحقیقات کے بعد فیصلہ سنایا کہ نسیم شاہ سوشل میڈیا گائیڈ لائنز کی متعدد شقوں کی خلاف ورزی کے مرتکب ہوئے ہیں۔ 27 مارچ کو جاری ہونے والے شوکاز نوٹس کے جواب میں فاسٹ باؤلر نے ذاتی طور پر پیش ہو کر غیر مشروط معافی بھی مانگی تھی، لیکن کمیٹی نے پیشہ ورانہ معیار اور ڈسپلن پر سمجھوتہ نہ کرنے کی پالیسی کے تحت جرمانے کی سزا برقرار رکھی۔
اس معاملے میں پی سی بی نے صرف کھلاڑی کو ہی سزا نہیں دی، بلکہ نسیم شاہ کے سوشل میڈیا ایڈوائزر کو بھی اس غفلت کا ذمہ دار ٹھہراتے ہوئے فوری طور پر برطرف کرنے کے بعد بلیک لسٹ کر دیا ہے۔ بورڈ کا کہنا ہے کہ کھلاڑیوں کی مینجمنٹ ٹیموں کو بورڈ کی پالیسیوں سے ہم آہنگ ہونا پڑے گا۔
نسیم شاہ کا وضاحتی بیان: "غلطی میری ٹیم کی تھی”
جرمانہ عائد ہونے کے بعد نسیم شاہ نے اپنے ردعمل میں دوبارہ معافی مانگی اور اصل صورتحال واضح کی۔ ان کا کہنا تھا کہ:
"متنازع پوسٹ میرے ذاتی خیالات کی عکاسی نہیں کرتی تھی بلکہ یہ میری مینجمنٹ ٹیم کی ایک بڑی غلطی تھی۔ تاہم، میں اپنے ڈیجیٹل پلیٹ فارم کی پوری ذمہ داری قبول کرتا ہوں۔”
نسیم شاہ نے مزید بتایا کہ انہوں نے اپنے سوشل میڈیا سیٹ اپ میں ضروری تبدیلیاں نافذ کر دی ہیں تاکہ مستقبل میں اس قسم کی کوئی بھی پریشان کن صورتحال دوبارہ پیدا نہ ہو۔
A recent post from my account was made by my management team and does not reflect my views.
I take full responsibility for my platform and have implemented the necessary changes to ensure this does not happen again.
I sincerely apologise to everyone affected by this misuse of…
— Naseem Shah (@iNaseemShah) March 30, 2026
یادرہے جمعرات 26 مارچ کو پاکستان سپر لیگ کے افتتاح کے موقع پر وزیر اعلیٰ پنجاب مریم نواز کی قذافی سٹیڈیم آمد کے موقع پر نسیم شاہ کے ایکس اکاؤنٹ سے ایک پوسٹ کی گئی تھی جس میں درج تھا کہ ’ان کے ساتھ ملکہ کی طرح کا برتاؤ کیوں کیا جا رہا ہے؟‘
یہ پوسٹ سوشل میڈیا پر تیزی سے وائرل ہو گئی تھی، جس میں نسیم شاہ کے فینز اور کرکٹ مبصرین اس خدشے کا اظہار کر رہے تھے کہ یہ نسیم شاہ کے لیے مستقبل میں مشکلات کا باعث بن سکتی ہے۔
نسیم شاہ کا مؤقف تھا کہ ان کا ایکس اکاؤنٹ ہیک ہو گیا تھا جسے بعد میں کامیابی سے بحال کرا لیا گیا تھا۔