ریاض، دبئی: مسلمانوں کو عید الفطر بھی میزائیلوں کی بارش کے درمیان منانا پڑ رہا ہے۔ جنگ کے سائے میں سعودی عرب اور قطر سمیت خلیجی ممالک میں آج عید الفطر منائی جارہی ہے۔ نماز عید الفطر کے سب سے بڑے اجتماعات مسجد الحرام اور مسجد نبویﷺ میں منعقد ہوئے، جہاں لاکھوں فرزندان توحید نے نماز عید الفطر ادا کی۔
خادم حرمین شریفین شاہ سلمان بن عبدالعزیز نے دنیا بھر کے مسلمانوں کو عید الفطر کی مبارکباد دی، شاہ سلمان نے عالمی امن و استحکام کے لیے کوششیں جاری رکھنے کے عزم کا اعادہ کیا، امتِ مسلمہ کے لیے امن، سلامتی اور استحکام کی دعا کی۔
دوسری جانب ترکیہ، لبنان، یمن، فلسطین اور عراق میں بھی آج عید الفطر منائی جارہی ہے۔ آسٹریلیا میں بھی آج عید ہے، وزیراعظم انتھونی البانیسی سڈنی کی مسجد گئے جہاں انہوں نے مسلمانوں کے تہوار میں شریک ہوکر مبارکباد دی۔ امریکہ میں بھی عید الفطر کا چاند نظر آگیا، عید الفطر آج منائی جائے گی، جہاں ابھی رات کا وقت ہے اور صبح نکلنے کا انتظار ہے۔ جب فرزندانِ توحید امریکہ میں بھی نماز عید ادا کریں گے۔
برطانیہ سمیت یوروپ بھر میں مسلم کمیونٹی کی بڑی تعداد نے آج عید منانے کا اعلان کردیا، لندن میں سب سے بڑی اور رنگارنگ چاند رات دیکھی ہوئی، چاند رات میں بازاروں میں لوگوں کی گہماگہمی دیکھنے میں آئی۔ ہاتھوں پر حنا کے خوبصورت ڈیزائن بنوانے کے لیے مہندی کے اسٹالز پر خواتین کی لمبی قطاریں لگی رہیں۔
