سیاست سے ہالی ووڈ تک کا سفر: کینیڈا کے سابق وزیراعظم جسٹن ٹروڈو نے کون سا کاروبار کرنیکا فیصلہ کیا؟

اوٹاوا:کینیڈا کے سابق وزیراعظم جسٹن ٹروڈو نے وزارتِ عظمیٰ کے منصب سے سبکدوش ہونے کے بعد باضابطہ طور پر انٹرٹینمنٹ کی دنیا میں قدم رکھ دیا ہے۔ انہوں نے اپنے دیرینہ اور قریبی چیف آف اسٹاف کیٹی ٹیلفورڈ کے ساتھ مل کر "ہوپ اینڈ ہارڈ ورک” (Hope and Hard Work) نامی ایک نئی میڈیا اور انٹرٹینمنٹ پروڈکشن کمپنی قائم کرنے کا اعلان کیا ہے۔
ذرائع کے مطابق یہ نئی پروڈکشن کمپنی فلم، ٹیلی ویژن، آڈیو اور لائیو انٹرٹینمنٹ کے مختلف پراجیکٹس کے ذریعے ایسی متاثر کن کہانیاں دنیا کے سامنے لائے گی جن کا بنیادی مقصد معاشرے میں باہمی سمجھ بوجھ، رواداری اور انسانی روابط کو فروغ دینا ہے۔ کمپنی کا یہ منفرد نام اس مشہور جملے سے ماخوذ ہے جسے جسٹن ٹروڈو نے سن 2013 میں لبرل پارٹی کی قیادت سنبھالنے کے بعد اپنی سیاسی تقاریر میں بطور ترانہ بارہا استعمال کیا تھا۔
جسٹن ٹروڈو نے 2015 سے 2025 تک کینیڈا کے وزیراعظم کے طور پر خدمات سر انجام دیں۔ انہوں نے گزشتہ برس جنوری میں لبرل پارٹی کی قیادت اور وزارتِ عظمیٰ سے استعفیٰ دے دیا تھا، جس کے بعد مارک کارنی نے کینیڈا کے وزیراعظم کا منصب سنبھالا تھا۔ اقتدار چھوڑنے کے بعد سے جسٹن ٹروڈو زیادہ تر سیاسی منظرنامے اور عوامی نظروں سے دور رہے ہیں، اور اب اس میڈیا وینچر کے ذریعے وہ تخلیقی اور کاروباری میدان میں ایک نئی اننگز کا آغاز کرنے جا رہے ہیں۔