ڈرون حملے کے بعد دبئی ایئرپورٹ سے پروازیں منسوخ ، آبنائے ہرمز پرچین اور نیٹو مدد کریں۔۔ ٹرمپ ، جاپان ، آسٹریلیا کا انکار

واشنگٹن+تل ابیب +تہران+ریاض+دبئی+لندن:اسرائیل امریکا اور ایران کی جنگ آج 17ویں روز میں داخل ہو چکی ہے۔ اسرائیل اور امریکا کے ایران پر حملوں میں تیزی آئی ہے تو وہیں ایران بھی اسرائیل اور خلیجی ممالک میں امریکی تنصیبات پر حملے جاری رکھے ہوئے ہے۔امریکا اور ایران کی جانب سے اس جنگ کے مستقبل کے حوالے سے متضاد بیانات کے بعد اس جنگ کے خاتمے کے لیے کسی بھی معاہدے کا امکان بہت دُور دکھائی دے رہا ہے۔
‘ہم یاد رکھیں گے’ نئے اتحاد میں کون شامل ہوتا ہے: ٹرمپ
امریکا کے صدر ڈونلڈ ٹرمپ نے کہا ہے کہ آبنائے ہرمز کی ’پولیسنگ‘ کے لیے ’تقریباً سات‘ ممالک سے بات چیت ہوئی ہے۔اتوار کو فلوریڈا سے واشنگٹن واپسی کی پرواز میں صحافیوں سے گفتگو کرتے ہوئے امریکی صدر کا کہنا تھا کہ ’میں نے چین سے پوچھا کہ کیا آپ آنا پسند کریں گے؟ اور ہم دیکھیں گے کہ وہ کیا فیصلہ کرتے ہیں۔صدر ٹرمپ کا کہنا تھا کہ چین تیل کی ترسیل کے لیے آبنائے ہرمز پر بہت زیادہ انحصار کرتا ہے۔

ٹرمپ نے یہ نہیں بتایا کہ چین کے علاوہ اُن کی کس ملک سے اس حوالے سے بات چیت ہوئی ہے۔ لیکن اُن کا کہنا تھا کہ نیٹو اور دوسرے ممالک جو اس علاقے کے ذریعے اپنی توانائی کی ضروریات حاصل کرتے ہیں اُنھیں بھی ’اپنی اپنی سرزمین‘ کا دفاع کرنے کی ضرورت ہے۔صدر ٹرمپ نے کہا کہ ’میں نے اپنے ہم منصبوں سے کہا ہے کہ اگر وہ مدد نہیں کرتے تو ہم یاد رکھِیں گے۔‘ امریکی صدر کا مزید کہنا تھا کہ کچھ ممالک کے پاس بارودی سرنگیں رکھنے اور ایک خاص قسم کی کشتی ہے جو ہماری مدد کر سکتی ہے۔واضح رہے کہ سنیچر کو بھی صدر ٹرمپ نے اپنے سوشل میڈیا پلیٹ فارم ٹروتھ سوشل پر لکھا تھا کہ وہ امید کرتے ہیں چین، فرانس، جاپان، جنوبی کوریا اور برطانیہ آبنائے ہرمز میں جنگی بحری جہاز بھیجیں گے تاکہ ایران وہاں کسی قسم کا خطرہ نہ پیدا کر سکے۔

آسٹریلیا ، جاپان کا جنگی بحری جہاز بھیجنے سے انکار

آسٹریلیا اور جاپان نے آبنائے ہرمز کی سکیورٹی کے لیے اپنے جنگی بحری جہاز بھیجنے سے انکار کر دیا ہے۔آسٹریلیا کی وزیر ٹرانسپورٹ کیتھرین کنگ نے پیر کو ایک بیان میں کہا کہ اُن کا ملک آبنائے ہرمز میں اپنے بحری جنگی جہاز نہیں بھیجے گا۔وزیر ٹرانسپورٹ نے نشریاتی ادارے اے بی سی کو بتایا کہ ’ہم آبنائے ہرمز میں جہاز نہیں بھیجیں گے۔ ہم جانتے ہیں کہ یہ کتنا اہم ہے، لیکن یہ وہ چیز نہیں ہے جس کے لیے ہم سے کہا گیا ہے اور یہ ایسی چیز نہیں ہے جس میں ہم اپنا حصہ ڈال رہے ہیں۔‘

جاپانی وزیر دفاع شنجیرو کوئزومی نے پارلیمنٹ کو بتایا کہ ایران کی موجودہ صورتحال کے پیش نظر ہم میری ٹائم سکیورٹی آپریشن شروع کرنے کا کوئی ارادہ نہیں رکھتے۔خیال رہے کہ امریکی صدر ڈونلڈ ٹرمپ نے نیٹو اور اتحادی ممالک سے کہا ہے کہ وہ آبنائے ہرمز کی سکیورٹی کے لیے اپنے بحری جنگی جہاز بھیجیں۔

دبئی ائیر پورٹ پر ڈرون حملہ،پروازیں معطل

دبئی میں حکام نے ’ڈرون سے متعلقہ واقعے‘ کے بعد مسافروں اور عملے کی حفاظت کو یقینی بنانے کے لیے احتیاطی اقدام کے طور پر دبئی انٹرنیشنل ایئر پورٹ پر پروازیں عارضی طور پر معطل کرنے کا اعلان کیا ہے۔حکام کے مطابق ’ڈرون سے متعلقہ واقعے‘ کے بعد لگنے والی آگ پر ردعمل دے رہے ہیں جس کی وجہ سے ایک فیول ٹینک متاثر ہوا ہے۔

مسافروں کو مشورہ دیا جا رہا ہے کہ وہ پروازوں سے متعلق معلومات کے لیے ایئر لائنز سے رابطہ کریں۔دبئی ایئر پورٹ کا شمار دُنیا کے مصروف ترین ہوائی اڈوں میں ہوتا ہے۔ سنہ 2025 میں اس کے ذریعے نو کروڑ مسافروں نے سفر کیا تھا۔
ابوظہبی: میزائل حملے میں ایک فلسطینی ہلاک
حکام نے بتایا کہ، اماراتی دارالحکومت ابوظہبی کے مضافات میں ایک فلسطینی شہری اس وقت ہلاک ہوگیا جب پیر کے روز ایک میزائل اس کی گاڑی سے ٹکرا گیا۔ ابوظہبی کے میڈیا آفس نے ایک بیان میں کہا کہ اماراتی ابوظہبی کے حکام نے البحیہ کے علاقے میں ایک شہری گاڑی پر میزائل حملے کے واقعے پر ردعمل ظاہر کیا ہے جس کے نتیجے میں ایک فلسطینی شہری ہلاک ہو گیا۔
سوشل میڈیا پر گمراہ کن پوسٹیں، متحدہ عرب امارات میں  19  بھارتی شہریوں سمیت 35 گرفتار

متحدہ عرب امارات میں حکام نے 35 افراد کو گرفتار کرنے کا حکم دیا ہے، جن میں 19 ہندوستانی شہری بھی شامل ہیں۔ وام نیوز ایجنسی نے رپورٹ ان پر الزام ہے کہ، ان لوگوں نے ایرانی حملوں سے متعلق ایسے ویڈیو کلپس سوشل میڈیا پر پوسٹ کیےجن میں مبینہ طور پر "گمراہ کن اور من گھڑت مواد” شامل ہے۔متحدہ عرب امارات کے اٹارنی جنرل ڈاکٹر حماد سیف الشمسی نے کہا کہ اس طرح کے اقدامات قانونی جرم ہے اور اس پر کم از کم ایک سال قید اور 1,00,000 درہم جرمانہ ہو سکتا ہے۔
اسرائیل نے جنوبی لبنان میں زمینی کارروائی کا اعلان کر دیا
اسرائیلی فوج نے کہا ہے کہ اس کی 91ویں بریگیڈ نے اپنے "فارورڈ ڈیفنس زون” کو وسیع کرنے کے لیے جنوبی لبنان میں زمینی کارروائیاں شروع کر دی ہیں۔ ایکس پر ایک پوسٹ میں، فوج نے کہا کہ آپریشن کا مقصد حزب اللہ کے بنیادی ڈھانچے کو تباہ کرنا، خطرات کو دور کرنا اور لبنان کی سرحد کے قریب رہنے والے اسرائیلی باشندوں کے لیے اضافی حفاظتی تہہ بنانا تھا۔

لبنان کی وزارت صحت کے مطابق 28 فروری سے ملک پر اسرائیلی حملوں میں کم از کم 850 افراد ہلاک ہو چکے ہیں جن میں 66 خواتین، 107 بچے اور 32 ہیلتھ ورکرز شامل ہیں۔ مزید 2,105 افراد زخمی ہوئے ہیں جبکہ 800,000 سے زیادہ بے گھر ہوئے ہیں۔
سعودی عرب نے 60ڈرونز کو تباہ کیا
سعودی وزارت دفاع نے اعلان کیا ہے کہ اس نے ملک کے مشرق میں ڈرون کی تین لہروں کو روک کر تباہ کر دیا۔ اس میں کہا گیا ہے کہ تازہ ترین لہر میں 12 ڈرونز کو تباہ کر دیا گیا، جبکہ اس سے پہلے چھ کو مار گرایا گیا۔ مزید پانچ کو پہلے ہی روکا گیا تھا۔یہ رپورٹ وزارت کی طرف سے اس اطلاع کے بعد سامنے آئی ہے کہ اس نے صبح کے اوائل میں 37 ڈرونز کو روکا تھا۔

توانائی کا بحران مزید سنگین ہو سکتا ہے، امریکی تیل کمپنیوں کے سی ای اوزکی وائٹ ہاؤس کو وارننگ
وال سٹریٹ جرنل کی رپورٹ کے مطابق، امریکی تیل کے ایگزیکٹوز نے وائٹ ہاؤس کے ذریعہ منعقدہ اجلاسوں میں حکام کو بتایا ہے کہ ایران کے خلاف امریکا اسرائیل جنگ سے پیدا ہونے والا توانائی کا بحران مزید خراب ہونے کا امکان ہے۔  اخبار نے کہا کہ ایکسن، شیورون اور کونوکو فلپس کے سی ای اوز نے توانائی کے سیکرٹری کرس رائٹ اور سیکرٹری داخلہ ڈوگ برگم کو متنبہ کیا کہ آبنائے ہرمز سے توانائی کی ترسیل میں رکاوٹ عالمی توانائی کی منڈیوں میں اتار چڑھاؤ پیدا کرتی رہے گی۔