واشنگٹن ڈی سی :امریکی صدر ڈونلڈ ٹرمپ نے کہا کہ انہوں نے اسرائیلی وزیرِاعظم بینجمن نیتن یاہو کے ساتھ ایک معاہدہ کیا ہے، جس کے تحت رواں سال کے اختتام کے بعد امریکہ اسرائیل کو فوجی امداد فراہم نہیں کرے گا۔
امریکی ٹی وی چینل فاکس نیوز کے پروگرام فاکس اینڈ فرینڈز سے گفتگو کرتے ہوئے ٹرمپ نے کہا کہ اسرائیل کو اب اس امداد کی ضرورت نہیں رہی۔ ان کا کہنا تھا کہ بعض ڈیموکریٹ اور بائیں بازو سے تعلق رکھنے والے سیاست دان اسرائیل کو دی جانے والی امریکی مالی امداد کو ریپبلکن جماعت پر تنقید کے لیے سیاسی موضوع کے طور پر استعمال کر رہے ہیں۔
ٹرمپ نے فاکس نیوز کے پروگرام میں گفتگو کرتے ہوئے کہا جہاں تک اسرائیل کو مالی امداد فراہم کرنے کا تعلق ہے تو بینجمن نیتن یاہو اور میں نے ایک معاہدہ کیا تھا، جس کے تحت ہم اسرائیل کو سالانہ 4 ارب ڈالر فراہم کرتے ہیں۔ تاہم ہم نے کئی ماہ پہلے ہی یہ فیصلہ کر لیا تھا کہ اس امداد کو بند کر دیا جائے گا۔ انہوں نے مزید کہا ہم پہلے ہی اس بات پر متفق ہو چکے ہیں کہ رواں سال کے اختتام تک ہم اسرائیل کو مالی امداد فراہم کرنا بند کر دیں گے۔ تاہم اگر اسرائیل کو ضرورت پیش آئی تو امریکہ اس کی مدد کرے گا۔
