جموں: مقبوضہ جموں و کشمیر میں ایک شادی کی تقریب کے دوران سابق وزیر اعلیٰ اور این سی سربراہ فاروق عبد اللہ پر قاتلانہ حملہ ہوا جس میں وہ میں بال بال بچ گئے۔ 68 سالہ شوٹر گرفتار کرلیا گیا،
سی سی ٹی وی فوٹیج میں دیکھا جا سکتا ہے کہ کمل سنگھ جموال کے نام کے ایک 68 سالہ شخص نے اپنی پستول سے فاروق عبداللہ کو بالکل قریب سے گولی مارنے کی کوشش کی لیکن خوش قسمتی سے وہ اس حملے میں بال بال بچ گئے اور انہیں کوئی نقصان نہیں پہنچا۔
قاتلانہ حملے کے بعد پولیس نے فوری طور پر ملزم کو گرفتار کر لیا اور اس سے پوچھ گچھ جاری ہے کہ اس نے این سی صدر کو گولی مارنے کی کوشش کیوں کی۔
پولیس کو دیے گئے ایک بیان میں شوٹر کمل سنگھ جموال کا مبینہ طور پر کہنا تھا کہ وہ گذشتہ 20 سال سے فاروق عبداللہ کو قتل کرنا چاہتا تھا اور آج اسے موقع ملا لیکن وہ اپنی کوشش میں ناکام رہا۔ تاحال یہ بات سامنے نہیں آئی ہے کہ حملے کی وجہ کیا تھی؟
یہ واقعہ جموں کے گریٹر کیلاش علاقے میں رائل پارک بینکوئٹ ہال میں پیش آیا جہاں فاروق عبداللہ ایک این سی لیڈر کی بیٹی کی شادی تقریب میں شرکت کے لیے پہنچے تھے۔ ان کے ساتھ جموں و کشمیر کے ڈپٹی سی ایم سریندر چودھری اور دیگر رہنما بھی موجود تھے۔
اس واقعے سے جموں میں خوف و ہراس پھیل گیا ہے اور این سی صدر کو ان کے سکیورٹی اہلکاروں نے محفوظ مقام پر پہنچا دیا ہے۔
ان کی حفاظت کے لیے تعینات جے کے پی اور این ایس جی کے سکیورٹی اہلکار فوراً حرکت میں آئے اور اس کوشش کو ناکام بنا دیا۔ مزید یہ کہ ملزم کو حراست میں لے لیا گیا، جس کی شناخت بعد میں کمل سنگھ ولد اجیت سنگھ رہائشی پرانی منڈی، جموں کے طور پر ہوئی۔ ملزم کے قبضے سے واردات میں استعمال ہونے والا اسلحہ بھی برآمد کر لیا گیا ہے۔ مزید تفتیش جاری ہے۔