تہران+ تل ابیب+ واشنگٹن+ ریاض+مناما+دبئی:تہران میں آج شدید دھماکوں کی آوازیں سنی گئی ہیں۔
غیرملکی خبر رساں ایجنسی کے مطابق یہ دھماکے شہر کے مختلف حصوں میں محسوس کیے گئے، تاہم فوری طور پر یہ واضح نہیں ہو سکا کہ کس مقام کو نشانہ بنایا گیا۔غیرملکی خبر رساں ایجنسی کے مطابق یہ دھماکے شہر کے مختلف حصوں میں محسوس کیے گئے، تاہم فوری طور پر یہ واضح نہیں ہو سکا کہ کس مقام کو نشانہ بنایا گیا۔ دوسری طرف آبنائے ہرمز کو ایرانی قبضے سے چھڑانے کے لئے بندر لنگہ بندرگاہ کے قریب کئی ایرانی فوجی بحری جہازوں کو نشانہ بنایا ہے۔ یہ مقام تزویراتی طور پر انتہائی اہمیت کی حامل ‘آبنائے ہرمز’ کے قریب واقع ہے، جسے دنیا بھر کی تجارت اور توانائی کی فراہمی کے لیے سب سے حساس بحری گزرگاہ مانا جاتا ہے۔ اس حملے کے بعد خطے میں سمندری آمد و رفت اور سیکیورٹی کی صورتحال مزید سنگین ہونے کا خدشہ پیدا ہو گیا ہے۔
ایران میں گزشتہ نو دنوں میں 1255 سے زائد افراد ہلاک، 12000 زخمی
ایران کے نائب وزیر صحت علی جعفریان نے الجزیرہ سے بات کرتے ہوئے ایران میں گزشتہ نو دنوں کے دوران ہلاک اور زخمی ہونے والوں کی تعداد کے بارے میں جانکاری دی ہے۔ نائب وزیر صحت کے مطابق 12,000 سے زیادہ لوگ زخمی اور 1,255 لوگ مارے گئے۔ مقتولین کی عمریں آٹھ ماہ سے لے کر 88 سال کے درمیان تھیں۔ ہلاک ہونے والوں میں 200 خواتین بھی شامل ہیں۔ مناب ایلیمنٹری سکول میں 168 بچے مارے گئے۔ 55 ہیلتھ کیئر ورکرز زخمی اور 11 ہلاک ہوئے جن میں چار ڈاکٹر، دو نرسیں اور تین ایمرجنسی ورکرز شامل ہیں۔
بحرین کی آئل ریفائنری بھی تباہ
بحرین پر پیر کے روز ایک ایرانی حملے میں ملک کی واحد آئل ریفائنری میں بظاہر آگ بھڑک اٹھی۔ اس کے بعد ہوا میں دھوئیں کے گہرے بادل پھیل گئے۔
آن لائن ویڈیو میں مبینہ طور پر سیترا ریفائنری میں لگنے والی آگ کو دکھایا گیا ہے۔ بحرین کی سرکاری خبر رساں ایجنسی نے بعد میں ایک رپورٹ شائع کی جس میں کہا گیا ہے کہ "مامیر میں ایک تنصیب کو نشانہ بنانے والی ایرانی جارحیت کی وجہ سے آگ لگ گئی، جس میں مادی نقصان ہوا لیکن کوئی جانی نقصان نہیں ہوا۔” مامیر ریفائنری سے ملحق بحرین کا ایک گاؤں ہے۔
قطر میں سوشل میڈیا پر افواہیں پھیلانے پر313 افراد گرفتار
قطری وزارت داخلہ نے اعلان کیا ہے کہ جنرل ڈائریکٹوریٹ آف کریمنل انویسٹی گیشن کے اکنامک اینڈ الیکٹرانک کرائمز ڈیپارٹمنٹ نے متعلقہ حکام کی جانب سے جاری کردہ ہدایات کی خلاف ورزی کرتے ہوئے مختلف قومیتوں کے 313 افراد کو اس بنیاد پر گرفتار کیا کہ انھوں نے ویڈیوز بنائیں اور پھر سوشل میڈیا پر پوسٹ کر دیا۔
قطر کے مطابق ان ملزمان نے گمراہ کن معلومات اور افواہیں شائع کیں جو رائے عامہ کو مشتعل کرنے والی ہیں۔
ایران جنگ کا خاتمہ مشترکہ فیصلہ ہوگا: ٹرمپ
اتوار کو ٹائمز آف اسرائیل سے بات کرتے ہوئے امریکی صدر ڈونلڈ ٹرمپ نے کہا کہ ایران کے ساتھ جنگ کا خاتمہ اسرائیلی وزیر اعظم بنجمن نتن یاہو کے ساتھ "مشترکہ” فیصلہ ہوگا۔ ٹرمپ نے کہا، "میرے خیال میں یہ باہمی ہے۔۔۔ تھوڑا سا۔ ہم بات کر رہے ہیں۔ میں صحیح وقت پر فیصلہ کروں گا، لیکن ہر چیز کو مدنظر رکھا جائے گا۔”
اسرائیل کا لبنان حملے میں سفید فاسفورس کا استعمال، ہیومین رائٹس واچ
ہیومن رائٹس واچ (ایچ آر ڈبلیو) نے اپنی تازہ رپورٹ میں کہا ہے کہ اسرائیل نے رواں ماہ جنوبی لبنان کے رہائشی علاقوں میں سفید فاسفورس استعمال کیا، جو بین الاقوامی انسانی قانون کی خلاف ورزی ہے۔
رپورٹ کے مطابق سات تصاویر کی تصدیق کی گئی ہے جن میں یُحمور کے رہائشی قصبے پر سفید فاسفورس گولہ باری اور کم از کم دو گھروں میں آگ لگنے کے واقعات دکھائے گئے ہیں۔ یہ واقعہ تین مارچ کو پیش آیا۔
ہیومن رائٹس واچ کے محقق رمزی کیس نے کہا کہ ’رہائشی علاقوں پر اسرائیلی فوج کا سفید فاسفورس استعمال غیر قانونی اور نہایت تشویشناک ہے، جس کے شہریوں پر سنگین اثرات مرتب ہوں گے۔‘
انھوں نے مزید کہا کہ سفید فاسفورس کے جلانے والے اثرات موت یا ایسے شدید زخم پیدا کر سکتے ہیں جو عمر بھر کی تکلیف کا باعث بنتے ہیں۔
ایچ آر ڈبلیو نے سات تصاویر کی تصدیق اور جغرافیائی محلِ وقوع کی نشاندہی کی ہے جن میں فضائی دھماکے کے ذریعے سفید فاسفورس دکھائی دیتا ہے، اور شہری دفاع کے کارکن گھروں اور ایک گاڑی میں لگی آگ بجھا رہے ہیں