لاہور:(ملک ظہیر) کیپٹل سٹی پولیس چیف بلال صدیق کمیانہ کی زیرِ صدارت پولیس ہیڈکوارٹرز میں ایک اعلیٰ سطحی اجلاس منعقد ہوا جس میں افسران کو دیے گئے اہداف پر پیش رفت اور شہر میں امن و امان کی صورتحال کا تفصیلی جائزہ لیا گیا۔ سی سی پی او لاہور نے اجلاس سے خطاب کرتے ہوئے واضح کیا کہ اشتہاری مجرمان کی گرفتاری کے لیے کوئی کسر اٹھا نہ رکھی جائے اور شہر کے چپے چپے میں سرچ و کامبنگ آپریشنز کا سلسلہ پوری قوت سے جاری رکھا جائے۔ انہوں نے کائٹ فلائنگ ایکٹ کی خلاف ورزی کرنے والوں اور سڑکوں پر ون ویلنگ کے ذریعے شہریوں کی زندگیوں سے کھیلنے والے عناصر کے خلاف فوری اور سخت قانونی کارروائیوں کے احکامات جاری کیے۔ بلال صدیق کمیانہ نے زیرِ تفتیش مقدمات کی سست روی پر برہمی کا اظہار کرتے ہوئے ہدایت کی کہ تمام زیرِ التوا مقدمات کو میرٹ پر جلد از جلد مکمل کیا جائے اور ملزمان کی لوکیشن ٹریس کرنے کے لیے جدید ٹیکنالوجی کا سہارا لیا جائے۔ انہوں نے افسران پر زور دیا کہ ایک ‘کرائم فری سوسائٹی’ کا خواب تب ہی شرمندہ تعبیر ہو سکتا ہے جب پولیس اپنی تمام تر پیشہ ورانہ صلاحیتیں عوام کی جان و مال کے تحفظ کے لیے وقف کر دے۔ اس موقع پر ڈی آئی جی ایڈمن عمران کشور، ڈی آئی جی انوسٹی گیشن ذیشان رضا، ایس ایس پی آپریشنز توقیر محمد نعیم اور تمام ڈویژنل ایس پیز بھی موجود تھے۔