لاہور: وزیراعلیٰ پنجاب مریم نواز شریف نے صوبے میں زراعت کی ترقی اور چھوٹے کاشتکاروں کو بااختیار بنانے کے لیے "سی ایم گرین ٹریکٹر پروگرام” کے تیسرے مرحلے (فیز-3) کا باقاعدہ افتتاح کر دیا ہے۔ قرعہ اندازی کے ذریعے 10 ہزار خوش نصیب کسانوں کا انتخاب کیا گیا ہے جنہیں سبسڈی پر ٹریکٹرز فراہم کیے جائیں گے۔
وزیراعلیٰ نے قرعہ اندازی کے فوری بعد بہاولپور کے کسان حمزہ لیاقت سمیت دیگر کامیاب کاشتکاروں کو خود فون کیا۔ انہوں نے کسانوں کو مبارکباد دیتے ہوئے کہا کہ مسلم لیگ (ن) کی حکومت ہمیشہ کاشتکاروں کی فلاح و بہبود کو اولین ترجیح دیتی ہے۔ انہوں نے مزید کہا کہ "گرین ٹریکٹر اسکیم پنجاب کے زرعی لینڈ سکیپ کو بدل کر رکھ دے گی۔”
صوبائی وزیر زراعت سید عاشق حسین کرمانی نے بریفنگ میں بتایا کہ فیز-3 کے لیے 5 ایکڑ تک اراضی کے مالک 4 لاکھ 27 ہزار کاشتکاروں نے درخواستیں جمع کروائیں، جو اس اسکیم کی مقبولیت کا منہ بولتا ثبوت ہے۔ اس مرحلے میں 50 سے 65 ہارس پاور کے 10 ہزار ٹریکٹرز دیے جا رہے ہیں۔ اب تک دو مراحل مکمل ہو چکے ہیں جن کے تحت 21 ہزار ٹریکٹرز کاشتکاروں کے حوالے کیے جا چکے ہیں۔
یادرہے ایک رپورٹ کے مطابق گزشتہ پانچ سالوں میں ٹریکٹرز کی قیمتوں میں 100 فیصد سے زائد اضافہ ہوا، جس نے چھوٹے کسانوں کی قوتِ خرید ختم کر دی تھی۔پنجاب میں اس وقت فی 10 ہزار ایکڑ اراضی پر صرف 140 ٹریکٹر دستیاب ہیں، جو عالمی تناسب کے مقابلے میں 50 فیصد سے بھی کم ہیں۔حکومتِ پنجاب کا ہدف زرعی مشینری کے استعمال کو بڑھا کر فی ایکڑ پیداوار میں اضافہ کرنا ہے۔