تحریر:افضل سیال
جہاں لفظ بے نقاب ہوں۔۔۔ وہیں سے سچ کا آغاز ہوتاہے
لاہور ویسٹ مینجمنٹ کمپنی (LWMC) کے سرکل ون میں مبینہ مالی بے ضابطگیوں اور فیول چوری کا بڑا سکینڈل سامنے آیا ہے، جس میں ڈپٹی سی او مبین احمد اور ان کے قریبی ساتھی سینئر منیجر محسن صبور پر سنگین الزامات عائد کیے گئے ہیں۔
باوثوق ذرائع کے مطابق سرکل ون کے پانچ ٹاؤنز میں موجود تقریباً 500 بڑی گاڑیوں سے یومیہ بنیادوں پر فی گاڑی ایک ہزار روپے وصول کیے جا رہے ہیں، جس کے نتیجے میں روزانہ تقریباً 5 لاکھ روپے اور ماہانہ ایک کروڑ 50 لاکھ روپے کی رقم فیول کی مد میں مبینہ طور پر خردبرد کی جا رہی ہے۔ مزید برآں، سرکل میں چلنے والے تقریباً 700 رکشوں سے بھی یومیہ ایک لیٹر فیول بطور رشوت لینے کا انکشاف ہوا ہے، جس کی مالیت روزانہ تقریباً 1 لاکھ 93 ہزار 900 روپے اور ماہانہ 58 لاکھ 17 ہزار روپے بنتی ہے۔ اس طرح مجموعی طور پر فیول چوری اور رشوت کی مد میں ماہانہ 2 کروڑ روپے سے زائد کی بے ضابطگیوں کا تخمینہ لگایا گیا ہے۔
ذرائع کا کہنا ہے کہ محسن صبور بطور فرنٹ مین مختلف ٹاؤنز گلبرگ، علامہ اقبال، داتا گنج بخش، نشتر اور سمن آباد—میں تعینات ایم وی آئیز پر دباؤ ڈال کر مبینہ طور پر یہ رقم اکٹھی کرتے اور اسے ڈپٹی سی او تک پہنچاتے ہیں۔ مزید یہ کہ محسن صبور کو غیر معمولی اختیارات اور مراعات دینے کے لیے سینئر منیجر کا چارج بھی دیا گیا، جس پر اندرونی حلقوں میں سوالات اٹھائے جا رہے ہیں۔اہم بات یہ ہے کہ اس بڑے مالی سکینڈل پر متعلقہ افسران کی جانب سے تاحال کوئی باضابطہ مؤقف سامنے نہیں آیا۔ ذرائع کے مطابق مؤقف دینے سے دانستہ گریز کیا جا رہا ہے۔ اگر نامزد افسران ان الزامات پر اپنا مؤقف دینا چاہیں تو اسے بھی شائع کیا جائے گا۔