مری میں 11.5 انچ برف پڑنے کےبعدسڑکیں بند، ملک بھر میں برفباری ،بارش کا سلسلہ

اسلام آباد :پاکستان کے مختلف علاقوں میں بارشوں اور برفباری کا سلسلہ جاری ہے جبکہ سردی کی شدت میں بھی اضافہ ہوا ہے۔
محکمہ موسمیات کی جانب سے جاری ایڈوائزری کے مطابق، آئندہ 24 گھنٹوں کے دوران مزید بارشوں اور شدید برفباری کا امکان ہے۔
اب تک صوبہ خیبر پختونخوا کے کئی علاقوں اور پنجاب کے سیاحتی مقام مری میں شدید برفباری ہوئی ہے۔
رات کے وقت ہونے والی شدید برفباری کے باعث مری کی جانب جانے والے داخلی راستے بند ہو گئے ہیں۔
اسلام آباد پولیس کے ترجمان کے مطابق مری جانے والے دونوں اہم راستوں پر ڈائیورشنز قائم کر دی گئی ہیں اور ٹریفک کو واپس موڑا جا رہا ہے۔ مری انتظامیہ برفباری کے باعث بند ہونے والے راستوں کو کھولنے کے لیے مشینری کے ذریعے کام میں مصروف ہے۔
ترجمان نے مری جانے کے خواہشمند سیاحوں سے اپیل کی ہے کہ وہ تاحکمِ ثانی اس طرف سفر سے گریز کریں اور ٹریفک پولیس کے ساتھ مکمل تعاون کریں۔ راستوں کی بحالی سے متعلق صورتحال بہتر ہوتے ہی سیاحوں کو بروقت آگاہ کر دیا جائے گا۔
محکمہ موسمیات کی طرف سے جاری اعداد و شمار کے مطابق، سردی کی حالیہ لہر کے دوران، سب سے زیادہ برفباری خیبر پختونخوا کے بالائی علاقوں میں دیکھنے میں آئی ہے۔ مالم جبہ میں اب تک 38 انچ جبکہ وادی کالام میں اب تک 30 انچ برفباری ریکارڈ کی جا چکی ہے۔ اس کے علاوہ چترال اور پاڑا چنار میں بالترتیب 16 اور 15 انچ برفباری ریکارڈ کی گئی ہے۔
صوبہ پنجاب کے سیاحتی مقام مری میں اب تک ساڑھے 11 انچ برف پڑ چکی ہے۔
اس کے علاوہ صوبہ بلوچستان کے علاقوں قلات اور کوئٹہ میں بھی بالترتیب 1.6 اور 1.5 انچ برفباری ہوئی ہے۔