ممبئی: بالی وڈ ہیرو رنویر سنگھ کی بجائے ولن اکشے کھنہ سے مقبولیت حاصل کرنے والی فلم ’دھورندھر‘ نے باکس آفس پر دھوم مچانے کا سلسلہ برقرار رکھتے ہوئے ایک اور بڑا سنگِ میل عبور کر لیا ہے۔
میڈیا رپورٹس کے مطابق ایک ماہ سے بھی کم عرضے میں دھورندھر فلم سال 2025 کی سب سے زیادہ کمائی کرنے والی انڈین فلم بن چکی ہے یادرہے فلم دسمبر کی پانچ تاریخ کوریلیز ہوئی تھی اور اب عالمی سطح پر ایک ہزار کروڑ (10ارب) انڈین روپے کمانے والی فلموں کے کلب میں بھی شامل ہو گئی ہے۔فلم نے محض 21 دنوں میں دنیا بھر سے 10 ارب چھ کروڑ انڈین روپے کی کمائی کر کے متعدد ریکارڈز توڑ دیے ہیں۔بالی وڈ پنڈتوں کے مطابق ’دھورندھر‘ نے اسی سال ریلیز ہونے والی بڑی فلموں ’کانتارا چیپٹر ون‘ اور ’چھاوا‘ کو بھی پیچھے چھوڑ دیا ہے۔
’کانتارا چیپٹر ون‘ نے عالمی سطح پر آٹھ ارب 52 کروڑ جبکہ ’چھاوا‘ نے آٹھ ارب سات کروڑ انڈین روپے کمائے تھے۔
رپورٹس کے مطابق ملکی سطح پر بھی فلم کی کارکردگی غیر معمولی رہی ہے۔ پہلے 21 دنوں میں ’دھورندھر‘ نے انڈیا میں 650 کروڑ روپے سے زائد کا بزنس کیا۔جیو سٹوڈیوز کے مطابق فلم نے ریلیز کے 21ویں دن 28.60 کروڑ روپے کمائے۔
’دھورندھر‘ نے ڈومیسٹک نیٹ کلیکشن کی بنیاد پر سب سے زیادہ کمائی کرنے والی انڈین فلموں کی ٹاپ ٹین فہرست میں بھی جگہ بنا لی ہے۔ اس نے رنبیر کپور کی فلم ’اینمل‘ کو پیچھے چھوڑتے ہوئے نویں پوزیشن حاصل کر لی ہے۔
ہدایتکار آدتیہ دھَر کی یہ فلم نہ صرف 2025 کی سب سے بڑی ہٹ ثابت ہو رہی ہے بلکہ حالیہ برسوں کی کامیاب ترین انڈین فلموں میں بھی شمار کی جا رہی ہے۔