اسلام آباد: وفاقی وزیر دفاع خواجہ آصف نے میڈیا سے گفتگو میں کہا ہے کہ کئی ماہ سے یہ بات کہہ رہے ہیں کہ دہشت گردی کے پیچھے ٹی ٹی پی اور افغانستان شریک ہیں اور کابل کی آشیرباد کے بغیر ٹی ٹی پی پاکستان میں اس پیمانے کی کارروائیاں نہیں کر سکتی۔ انہوں نے کہا کہ پہلے بھی جو حملے ہوئے تھے اُن میں افغان شہری نکلے جن کی شناخت ہوگئی ہے اور یہی شہادت ساری دنیا کے سامنے ہے اگر کابل ان کارروائیوں کا اعتراف نہ بھی کرے تو حقائق عیاں ہیں۔
وزیرِ دفاع نے مزید کہا کہ افغانستان بعض حلقوں کے ذریعے دہشت گردی کی پشت پناہی کر رہا ہے اور ساتھ ہی بھارت کی بھی مداخلت اور پشت پناہی کا ذکر کیا تاکہ پاکستان میں امن قائم نہ ہو سکے۔ انہوں نے ان سازشوں کی نشاندہی کرتے ہوئے کہا کہ دشمن کی یہ کوشش تھی کہ پاکستان کو چکر لگا کر نقصان پہنچایا جائے، مگر ہماری افواج اور سیکیورٹی اداروں نے دشمن کے خلاف جنگ جیتی ہے اور دہشت گردی کے خلاف جنگ بھی جیتیں گے۔
خواجہ آصف نے واضح الفاظ میں کہا کہ ریاست اور پاکستانی عوام کا پیغام یہ ہے کہ ہم دہشت گردوں کا پیچھا زمین کے آخری کونے تک کریں گے اور انہیں نیست و نابود کر دیں گے۔ انہوں نے سیکیورٹی فورسز کی کارروائیوں، جرأت اور پیشہ ورانہ کارکردگی کو سراہتے ہوئے عزمِ استقامت کا اعادہ کیا کہ ملک سے دہشت گردی کے مکمل خاتمے تک آپریشنز جاری رہیں گے۔