راولپنڈی:پاکستان اور قازقستان کی افواج کے درمیان انسداد دہشت گردی کے شعبے میں پاکستان اور قازقستان کی مشترکہ مشق دوستریم پنجم کی اختتامی تقریب چیرات میں منعقد ہوئی۔ دو ہفتے طویل مشق کا آغاز 14 اکتوبر کو ہوا تھاجس میں اسپیشل سروسز گروپ، پاکستان آرمی اور قازقستان اسپیشل فورسز کی کمبیٹ ٹیموں نے مشق میں حصہ لیا۔
ہفتہ کو آئی ایس پی آر سے جاری بیان کے مطابق کمانڈنٹ سپیشل آپریشنز سکول چیرات نے اختتامی تقریب میں بطور مہمان خصوصی شرکت کی۔ قازقستان کے سفیر اور دفاعی اتاشی نے بھی اختتامی تقریب کے موقع پر مشق کا مشاہدہ کیا۔ فوجیوں نے مشق کے دوران پیشہ ورانہ مہارت کے اعلیٰ ترین معیارات کا مظاہرہ کیا۔
اس مشق کا مقصد مشترکہ تربیت کے ذریعے انسداد دہشت گردی کی کارروائیوں میں شامل مشقوں، طریقہ کار اور تکنیکوں کو بہتر بنانا اوردوست ممالک کے درمیان تاریخی فوجی تعلقات کو فروغ دیناہے۔