رحیم یار خان:شیخانی پولیس پوسٹ حملے میں شہید 05 پولیس اہلکاروں کی نماز جنازہ صادق شہید پولیس لائنز میں ادا کر دی گئی ،آئی پنجانب ڈاکٹر عثمان انور سمیت اعلی سول و فوج حکام کی شرکت ۔ گارڈ آف آنر پیش ،پھولوں کی چادریں چڑھائی گئی ۔
نماز جنازہ میں آئی جی پنجاب، ڈاکٹر عثمان انور، ایڈیشنل آئی جی ایلیٹ پولیس فورس وقار عباسی، کمشنر بہاولپور، آر پی او بہاولپور رائے بابر سعید، ایس ایس پی گھوٹکی، ڈی پی او رحیم یار خان، ڈی پی او راجن پور، رینجرز اور پاک فوج کے افسران، شہدا کے اہلخانہ، سینئر پولیس افسران و اہلکاروں نے شرکت کی ۔
ترجمان پنجاب پولیس کے مطابق پولیس کے چاک و چوبند دستے نے شہدا کے جسد خاکی کو گارڈ آف آنر پیش کیا، جبکہ آئی جی پنجاب ڈاکٹر عثمان انور نے شہدا کے جسد خاکی کو سلامی پیش کی، پھولوں کی چادریں چڑھائیں
اس موقع پر خطاب کرتے ہوئے آئی جی پنجاب ڈاکٹر عثمان انور کا کہنا تھا کہ اہلکاروں کی جرات اور بہادری کو سلام اور ان کے ورثاء کو خراج عقیدت پیش کرتا ہوں۔پنجاب پولیس 1650 سے زائد بہادر شہدا کی امین فورس ہے، پولیس کچہ ایریا کے ڈاکوؤں اور شر پسند عناصر کو کیفر کردار تک پہنچائے گی۔ پولیس کے اہل خانہ کی ویلفیئر میں کوئی کسر اٹھا نہ رکھی جائے گی،شہدا کے اہلخانہ محکمہ پولیس کی ذمہ داری، احسن طور پر نبھائیں گے
آئی جی پنجاب نے کہا کہ کچہ کریمینلز کے خلاف مزید طاقت و حکمت عملی کے ساتھ نبرد آزما ہوں گے۔
ترجمان پنجاب پولیس کے مطابق شیخانی پولیس پوسٹ پر حملے میں ایلیٹ فورس کے 5 جوان شہید، جبکہ پولیس کی جوابی کارروائی میں 01 ڈاکو جہنم واصل ہوا، شہدامیں محمد عرفان، محمد سلیم، نخیل، خلیل اور غضنفر شامل ہیں نماز جنازہ کی ادائگی کے بعد شہداء پولیس کے جسد خاکی تدفین کیلئے ان کے آبائی علاقوں میں روانہ کردئیے گئے