لاہور (ویب ڈیسک) کریلا ایک ایسی سبزی ہے جو بے شمار طبی فوائد رکھنے کے باوجود اپنی قدرتی کڑواہٹ کے باعث کئی افراد کو ناپسند ہوتی ہے، تاہم ماہرینِ خانہ داری اور غذائیت کے مطابق چند سادہ گھریلو طریقے اپنا کر اس کی کڑواہٹ کو نمایاں حد تک کم کیا جا سکتا ہے۔
تفصیلات کے مطابق کٹے ہوئے کریلوں پر ایک سے دو کھانے کے چمچ نمک لگا کر 30 سے 45 منٹ کے لیے رکھ دینا سب سے مؤثر طریقہ سمجھا جاتا ہے۔ مقررہ وقت بعد کریلے کڑوا پانی چھوڑ دیتے ہیں، جسے دبا کر نچوڑنے اور صاف پانی سے دھونے کے بعد کڑواہٹ میں واضح کمی آ جاتی ہے۔
اس کے علاوہ پھینٹے ہوئے دہی یا پتلی لسی میں کریلوں کو 30 سے 40 منٹ تک بھگو کر رکھنا بھی مفید ثابت ہوتا ہے، کیونکہ دہی کی ہلکی کھٹاس کڑواہٹ کو جذب کر لیتی ہے۔ بعض گھروں میں کریلوں پر خشک گندم کا آٹا مل کر یا ابالے ہوئے چاولوں کی پیچ میں بھگو کر دھونے کا طریقہ بھی اپنایا جاتا ہے، جبکہ لیموں کا رس یا سفید سرکہ لگانے سے بھی تلخی کم ہوتی ہے۔
ماہرین کے مطابق کریلے کی کڑواہٹ کا بڑا حصہ اس کی بیرونی کھردری تہہ اور پکے ہوئے سخت بیجوں میں پایا جاتا ہے، اس لیے پکانے سے قبل اوپری چھلکا ہلکا کھرچ لینا اور بیج نکال دینا بہتر رہتا ہے۔ پکانے کے دوران پیاز کی مناسب مقدار، تھوڑی سی املی یا آمچور پاؤڈر کے استعمال اور ہلکے فرائی کرنے سے سالن کا ذائقہ مزید متوازن اور خوشگوار بن جاتا ہے۔


