نئی دہلی / بھاگلپور (بے نقاب نیوز / ویب ڈیسک)
بھارتی ریاست راجستھان سے اغوا کی جانے والی ایک پاکستانی لڑکی کو ریاست بہار کے ضلع بھاگلپور سے بحفاظت بازیاب کرا لیا گیا ۔
پولیس ذرائع کے مطابق ملزم نوجوان لڑکی کو شادی کا جھانسہ دے کر راجستھان سے بہار کے علاقے بھاگلپور بھگا لایا تھا۔ لڑکی کے لاپتہ ہونے اور مبینہ اغوا کی اطلاع پر راجستھان پولیس نے مقدمہ درج کر کے تحقیقات کا آغاز کیا اور تکنیکی شواہد کی مدد سے ملزم کی لوکیشن بھاگلپور میں ٹریس کر لی۔
اطلاع ملنے پر راجستھان پولیس کی خصوصی ٹیم نے مقامی بہار پولیس کے ہمراہ بھاگلپور میں کارروائی کرتے ہوئے لڑکی کو بازیاب کرا لیا، جبکہ ملزم کے خلاف قانونی کارروائی عمل میں لائی جا رہی ہے۔ پولیس حکام کا کہنا ہے کہ بازیاب کرائی گئی لڑکی کو قانونی تقاضے پورے کرنے کے بعد واپس راجستھان منتقل کیا جائے گا۔


