لاہور: وزیراعلیٰ پنجاب مریم نواز شریف نے صوبے کے عوام کو مہنگی بجلی سے ریلیف فراہم کرنے کے لیے ’سی ایم سولر پینل سکیم فیز ٹو‘ کی منظوری دے دی ہے، جبکہ فیز ٹو کے تحت سولر پینلز کی تعداد 90 ہزار سے بڑھا کر ایک لاکھ کرنے کا حکم بھی جاری کر دیا ہے۔
وزیراعلیٰ پنجاب کی زیرِ صدارت توانائی کے شعبے سے متعلق خصوصی اجلاس منعقد ہوا، جس میں صوبائی وزیر فیصل کھوکھر اور سیکرٹری انرجی نے جاری اور مجوزہ منصوبوں پر تفصیلی بریفنگ دی۔ اجلاس کے دوران وزیراعلیٰ نے چولستان میں 5 ہزار سولر پینلز کے پائلٹ پراجیکٹ اور چولستان کے 40 مقامات پر واٹر سپلائی سکیموں کو سولر انرجی پر منتقل کرنے کی بھی اصولی منظوری دے دی۔
مریم نواز شریف نے صوبے کے تمام بڑے سرکاری ہسپتالوں کا انرجی آڈٹ کرانے کا حکم دیتے ہوئے ہسپتالوں میں انرجی لوڈ کے مطابق الیکٹرک پینل لگانے کی ہدایت کی۔ علاوہ ازیں انہوں نے ’ستھرا پنجاب‘ کے اشتراک سے سالڈ ویسٹ سے انرجی اور بائیو فیول پراجیکٹ پر جامع پلان طلب کر لیا، جبکہ 3 ہزار ٹن ویسٹ سے انرجی پیدا کرنے کے پائلٹ پراجیکٹ کی بھی اصولی منظوری دی گئی۔
اجلاس میں اینیمل ویسٹ، زرعی فضلے (ایگری ویسٹ) اور سالڈ ویسٹ سے بائیو انرجی و بائیو فیول منصوبوں سمیت پنجاب میں کمرشل اسکیل، پرائیویٹ ڈیریز اور کمیونٹی بیسڈ بائیو گیس پلانٹس کا جائزہ لیا گیا۔ اس موقع پر ننکانہ صاحب میں دھان اور دیگر فصلوں کی باقیات سے بائیو ریفائنری پراجیکٹ پر رپورٹ بھی پیش کی گئی۔
بریفنگ کے دوران بتایا گیا کہ سی ایم سولر پینل سکیم کے فیز ون میں ساڑھے تین لاکھ سے زائد درخواستیں موصول ہوئیں، جبکہ 89 ہزار 869 افراد کو سولر پینل ملنے سے ان کے بجلی کے بلوں میں ایک تہائی بچت ہوئی ہے اور پنجاب کے 76 سکولوں کو پائلٹ پراجیکٹ کے طور پر سولر انرجی پر منتقل کر دیا گیا ہے۔
اجلاس کو مزید آگاہ کیا گیا کہ پنجاب میں 4 لاکھ 90 ہزار ٹن اینیمل ویسٹ سے 7.15 بلین کیوبک میٹر بائیو گیس پیدا کرنے کی صلاحیت موجود ہے، جبکہ اینیمل، ایگری اور سالڈ ویسٹ سے مجموعی طور پر 1.6 ارب یونٹ بجلی پیدا کی جا سکتی ہے۔ اس موقع پر انرجی ڈیپارٹمنٹ کے عوامی سروے کی رپورٹ بھی پیش کی گئی، جس میں شہریوں نے اس امر کا اظہار کیا کہ مریم نواز شریف کے غریب دوست فیصلوں اور سولر پینل سکیم کی بدولت ان کے بجلی کے بل تقریباً آدھے رہ گئے ہیں۔

