میاں چنوں: بورا روڈ پر کھڑی مٹی سے بھری ٹرالی جان لیوا حادثے کا سبب بن گئی، شہریوں کا سخت کارروائی کا مطالبہ

میاں چنوں (بینقاب نیوز رپورٹر عاصم کمال)

میاں چنوں کے بورا روڈ پر مٹی سے بھری کھڑی ٹرالی موت کا پروانہ بن گئی، جہاں غفلت کی انتہا نے ایک اور قیمتی جان نگل لی۔ مالکان کی جانب سے سڑک پر غلط اور غیر قانونی جگہ پر کھڑی کی جانے والی اس ٹرالی کی وجہ سے نہ صرف حادثات کا خطرہ بڑھ گیا ہے بلکہ یہ سوال بھی اٹھ کھڑا ہوا ہے کہ یہ لاپرواہی جانے اور کتنی جانوں کے ضیاع کا سبب بنے گی۔

مقامی شہریوں کے مطابق بورا روڈ کی چوڑائی پہلے ہی کافی کم ہے، اور ایسے میں سڑک کے بالکل درمیان میں یا نامناسب جگہ پر ٹرالی کھڑی کرنا انتہائی غیر ذمہ دارانہ اور خطرناک عمل ہے۔شہریوں اور علاقہ مکینوں نے اعلیٰ حکام سے پرزور مطالبہ کیا ہے کہ غفلت کے مرتکب ٹرالی مالکان کے خلاف فوری اور سخت قانونی کارروائی عمل میں لائی جائے تاکہ بورا روڈ پر آمدورفت کرنے والے شہریوں کی جان و مال کو محفوظ بنایا جا سکے اور آئندہ ایسے دلخراش واقعات کی روک تھام کی جا سکے۔