خوشاب (راجہ نورالہی عاطف سے) — کمشنر سرگودھا ڈویژن حافظ شوکت علی نے ڈپٹی کمشنر خوشاب ڈاکٹر جہانزیب حسین لابر کے ہمراہ جوہرآباد مظفرگڑھ روڈ پر واقع چک نمبر 14/53 ایم بی ماڈل ویلج کا تفصیلی دورہ کیا۔ اس موقع پر انہوں نے وزیراعلیٰ پنجاب کے "ستھرا پنجاب پروگرام” کے تحت صفائی ستھرائی کے انتظامات، ویسٹ مینجمنٹ اور عملے کی کارکردگی کا جائزہ لیا۔
دورے کے دوران ایڈیشنل ڈپٹی کمشنر میونسپل سروسز ذریاب ساجد اور تحصیل منیجر علی شہریار نے کمشنر کو بریفنگ دی۔ صفائی کے ناقص انتظامات پر برہمی کا اظہار کرتے ہوئے کمشنر حافظ شوکت علی نے متعلقہ تحصیل منیجر کی سخت سرزنش کی۔ انہوں نے ہدایت کی کہ خوشاب شہر کی مرکزی شاہراہوں، گلی محلوں، اور ماڈل ویلجز میں گھر گھر سے کوڑا کرکٹ کی بروقت کلیکشن اور تلفی کو یقینی بنایا جائے۔ انہوں نے ضلع کی چاروں تحصیلوں میں صفائی کے نظام کو مؤثر بنانے اور مقررہ اہداف کا سو فیصد حصول لازمی قرار دیا۔
کمشنر سرگودھا ڈویژن نے اس عزم کا اعادہ کیا کہ "ستھرا پنجاب پروگرام” وزیراعلیٰ پنجاب کا ایک فلاحی منصوبہ ہے، جس پر عملدرآمد میں کسی قسم کی سستی یا غفلت برداشت نہیں کی جائے گی۔
بعد ازاں، کمشنر حافظ شوکت علی نے سرکٹ ہاؤس، ڈی پی ایس روڈ (بالمقابل وائلڈ لائف پارک جوہرآباد) اور محلہ اعظم آباد میں شوالہ ڈرین کا بھی دورہ کیا۔ اس موقع پر پنجاب ڈویلپمنٹ پروگرام کے تحت جاری ترقیاتی منصوبوں، تعمیراتی کاموں اور شوالہ ڈرین کی حفاظتی دیواروں و ڈی سلٹنگ کے کام کا جائزہ لیا گیا۔ ایکسیئن ہائی وے اور اسسٹنٹ ڈائریکٹر پنجاب ڈویلپمنٹ پروگرام نے ترقیاتی امور پر بریفنگ دی۔
کمشنر سرگودھا ڈویژن نے ہدایت کی کہ تمام ترقیاتی منصوبے مقررہ مدت کے اندر مکمل کیے جائیں اور تعمیراتی میٹریل کے معیار، کوالٹی اور شفافیت پر کوئی سمجھوتہ نہ کیا جائے۔ دورے کے وقت ایڈیشنل ڈپٹی کمشنر میونسپل سروسز ذریاب ساجد، اسسٹنٹ کمشنر خوشاب اُمت السلام سمیت محکمہ ہائی وے اور دیگر متعلقہ محکموں کے افسران بھی موجود تھے۔