بینکاک:
تھائی لینڈ میں ایک دل دہلا دینے والا افسوسناک واقعہ پیش آیا ہے جہاں گولف کے جونیئر ٹورنامنٹ کے دوران آسمانی بجلی گرنے (Lightning Strike) سے 15 سالہ کم عمر کھلاڑی جاں بحق ہو گئی ہے۔ اس اندوہناک واقعے نے کھیلوں کے حلقوں میں سوگ کی فضا پیدا کر دی ہے اور ایونٹ کے انتظامات پر سوالات اٹھا دیے ہیں۔
غیر ملکی میڈیا رپورٹس کے مطابق حادثہ تھائی لینڈ کے صوبے چ (Chachoengsao) میں واقع ایک گولف کورس پر پیش آیا۔ ٹورنامنٹ کے دوران اچانک موسم خراب ہوا اور آسمانی بجلی براہِ راست 15 سالہ جونیئر گولفر "آیاورین ایا پرادوب یارت” (Aeyavarin “Aeya” Pradubyart) پر آ گری۔ اس حادثے میں ایک 31 سالہ خاتون کیڈی (Caddie) بھی زخمی ہوئی ہے، جسے طبی امداد کے لیے اسپتال منتقل کر دیا گیا ہے۔
جاں بحق ہونے والی کم عمر کھلاڑی کے اہل خانہ نے ٹورنامنٹ کی انتظامیہ پر شدید غم و غصے کا اظہار کرتے ہوئے سوال اٹھایا ہے کہ موسم خراب ہونے اور اس سے قبل بجلی چمکنے کے باوجود میچ کو روکا کیوں نہیں گیا؟ اہل خانہ کا یہ بھی الزام ہے کہ گولف کورس پر ایمبولینس یا بروقت ہنگامی طبی سہولیات کی عدم موجودگی کے باعث بچی کو اسپتال پہنچانے میں تاخیر ہوئی، جس سے اس کی جان نہ بچ سکی۔
کھیلوں کے ماہرین اور انسانی حقوق کے حلقوں نے مطالبہ کیا ہے کہ آؤٹ ڈور گیمز کے دوران کھلاڑیوں کی حفاظتی تدابیر اور ایمرجنسی پروٹوکولز کا سخت جائزہ لیا جائے تاکہ مستقبل میں ایسے المناک حادثات سے بچا جا سکے۔