اسلام آباد: وزیرِ اعظم محمد شہباز شریف رواں سال دسمبر کے پہلے ہفتے میں روس کا ایک اہم سرکاری دورہ کریں گے۔ سفارتی ذرائع کے مطابق اس دورے کی تیاریوں کا باضابطہ آغاز کر دیا گیا ہے تاکہ دونوں ممالک کے مابین دوطرفہ تعلقات کو مزید فروغ دیا جا سکے۔
ذرائع کا بتانا ہے کہ دورے کے دوران وزیراعظم شہباز شریف کی روس کے صدر ولادیمیر پیوٹن سے خصوصی ملاقات اور اعلیٰ سطح کے باضابطہ مذاکرات ہوں گے۔ ان ملاقاتوں میں دوطرفہ تعلقات، علاقائی صورتحال اور خطے میں امن و استحکام کے امور پر تبادلہ خیال کیا جائے گا۔
اس کے علاوہ، وزیراعظم ماسکو میں منعقدہ پاک روس مشترکہ بزنس فورم سے بھی خطاب کریں گے۔ اس دورے کے دوران وزیراعظم کے ہمراہ ایک بڑا تجارتی اور کاروباری وفد بھی ماسکو جائے گا، جس کا مقصد دونوں ممالک کے درمیان تجارت، معیشت، توانائی اور سرمایہ کاری کے شعبوں میں تعاون کو نئی بلندیوں تک پہنچانا ہے۔
تجزیہ کاروں کے نزدیک وزیرِ اعظم کا یہ دورہ پاکستان اور روس کے تعلقات میں ایک نیانگ موڑ ثابت ہو گا اور دونوں ممالک کے درمیان معاشی شراکت داری کو مزید مستحکم کرے گا۔