سیالکوٹ ( سلیم احمد اعوان شیخو بیورو رپورٹ)
ایڈیشنل ڈپٹی کمشنر میونسپل سروسز میاں سرمد حسین کی زیرِ صدارت ڈپٹی کمشنر آفس کے کانفرنس ہال سیالکوٹ میں ڈسٹرکٹ ایمرجنسی ریسپانس کمیٹی برائے انسدادِ ڈینگی کا ایک اہم اجلاس منعقد ہوا۔ اجلاس میں سی ای او ہیلتھ ڈاکٹر اسلم چودھری، ڈاکٹر شیراز مسعود، انیٹومالوجسٹ سحرش خالد، سی او ضلع کونسل زبیر وٹو اور دیگر متعلقہ محکموں کے افسران نے شرکت کی۔اجلاس کے دوران ضلع بھر میں ڈینگی کی موجودہ صورتِ حال، جاری سرویلنس سرگرمیوں، مشتبہ و تصدیق شدہ کیسز اور انسدادِ ڈینگی کے لیے کیے جانے والے اقدامات کا تفصیلی جائزہ لیا گیا۔ بریفنگ میں بتایا گیا کہ رواں برس اب تک ضلع سیالکوٹ میں ڈینگی کے 2,699 مشتبہ کیسز رپورٹ ہوئے ہیں، جن میں سے 7 ممکنہ اور 15 تصدیق شدہ کیسز سامنے آئے ہیں۔ڈینگی کی افزائش کو روکنے کے لیے جاری ویکٹر سرویلنس کے حوالے سے آگاہ کیا گیا کہ ان ڈور سرویلنس کے لیے 555 اور آؤٹ ڈور سرویلنس کے لیے 124 ٹیمیں سرگرم عمل ہیں۔ اس دوران مجموعی طور پر 193,123 گھروں اور 54,875 آؤٹ ڈور مقامات کی چیکنگ کی گئی۔ رپورٹ میں سال 2026ء کے دوران ڈینگی کے مثبت مقامات کی تعداد 71 بتائی گئی، جبکہ 2,802 ہاٹ اسپاٹس کی سو فیصد کوریج بھی مکمل کر لی گئی ہے۔اجلاس میں ڈیجیٹل مانیٹرنگ اور متعلقہ محکموں کی کارکردگی کا جائزہ لیتے ہوئے بتایا گیا کہ ہیلتھ سیکٹر کے تمام 86 اینڈرائیڈ موبائل فونز فعال ہیں، جبکہ لائن محکموں کے 2,116 میں سے 2,106 موبائل فونز فعال اور 10 غیر فعال ہیں۔ اس کے علاوہ ان ڈور، آؤٹ ڈور، مثبت لاروا، مریضوں اور ہاٹ اسپاٹس سے متعلق تھرڈ پارٹی ویریفکیشن (TPV) کی سرگرمیوں پر بھی روشنی ڈالی گئی۔شکایات کے ازالے کے حوالے سے بتایا گیا کہ ڈینگی وائرس رسپانس (DVR) شکایتی پورٹل پر موصول ہونے والی 1,055 شکایات میں سے 1,043 کو کامیابی سے حل کیا جا چکا ہے جبکہ صرف 12 شکایات زیرِ التوا ہیں۔ سال 2026ء کے دوران اب تک ڈسٹرکٹ ایمرجنسی ریسپانس کمیٹی کے 10 اور تحصیل ایمرجنسی ریسپانس کمیٹی کے 67 اجلاس منعقد کیے جا چکے ہیںاجلاس کے اختتام پر ایڈیشنل ڈپٹی کمشنر میاں سرمد حسین نے زور دیا کہ انسدادِ ڈینگی سرگرمیوں کا تسلسل، سرویلنس کے مؤثر نظام اور شکایات کے بروقت ازالے کو ہر صورت یقینی بنایا جائے تاکہ ضلع کو ڈینگی سے محفوظ رکھا جا سکے۔