مٹیاری رپورٹ عامر علی انڑ
ہالا میں سندھ ادبی بورڈ کے چیئرمین مخدوم سعیدالزمان نے ہنگامی پریس کانفرنس کرتے ہوئے کہا ہے کہ عام لوگوں کو سستا اور فوری انصاف فراہم کرنے کے لیے ہالا میں ایک لیگل ٹیم تشکیل دی جا رہی ہے، جبکہ عوام کے روزمرہ مسائل حل کرنے کے لیے ایک فیصلہ کمیٹی بھی قائم کی جائے گی، جو روزانہ کی بنیاد پر لوگوں کے مسائل کے فیصلے کرے گی۔مخدوم سعیدالزمان نے اعلان کیا کہ آئندہ انتخابات میں سانگھڑ، تھرپارکر اور ہالا کے لیے پاکستان پیپلز پارٹی کے ٹکٹ پر الیکشن لڑنے کے لیے درخواست دیں گے۔ اگر پارٹی کی جانب سے ٹکٹ دیا گیا تو وہ انتخابات میں حصہ لیں گے۔خاندانی جائیداد کے معاملے پر بات کرتے ہوئے مخدوم سعیدالزمان نے الزام عائد کیا کہ مخدوم طالب المولیٰ کی جانب سے حویلی کے لیے مختص کی گئی خاندانی جائیداد کے بعض کھاتے خاندان کے کچھ افراد نے تبدیل کروائے ہیں۔ ان کے مطابق اس معاملے پر کمشنر حیدرآباد اور ڈپٹی کمشنر مٹیاری کو تحریری درخواستیں بھی دی گئی ہیں، تاہم اب تک کوئی مؤثر تحقیقات یا کارروائی نہیں کی گئی۔
انہوں نے مزید الزام لگایا کہ خاندان کے بعض افراد نے اپنے ملازمین کے ذریعے انہیں قانونی نوٹس بھجوائے ہیں، جبکہ ان کے بقول یہ نوٹس دراصل خاندان کے افراد کی جانب سے بھجوائے گئے ہیں۔مخدوم سعیدالزمان نے ضلع کونسل مٹیاری کے ترقیاتی کاموں کے حوالے سے بھی تحفظات کا اظہار کرتے ہوئے کہا کہ ضلع کونسل کے چیئرمین مخدوم احمدالزمان ضلع میں ترقیاتی کام کروانے کی کوشش کر رہے ہیں، لیکن ان کے مطابق ضلع کونسل کے چیف آفیسر کی جانب سے ترقیاتی کاموں میں تعاون نہیں کیا جا رہا۔انہوں نے دعویٰ کیا کہ کروڑوں روپے کے فنڈز موجود ہونے کے باوجود ضلع مٹیاری میں ترقیاتی کام نہیں ہو رہے۔ انہوں نے ضلع مٹیاری کے ایک رکن قومی اسمبلی اور ایک رکن صوبائی اسمبلی پر الزام عائد کیا کہ انہوں نے خود ترقیاتی کام نہیں کروائے اور ضلع کونسل کے ارکان کو بھی کام کروانے سے روکا گیا۔ موجودہ حالات کو دیکھتے ہوئے سروری جماعت کے مریدین بھی پریشان ہیں۔انہوں نے سابق رکن سندھ اسمبلی مخدوم رفیق الزمان کا ذکر کرتے ہوئے کہا کہ وہ ابتدا سے ہی ان کے ساتھ رابطے میں رہے ہیں اور مختلف معاملات پر مشاورت میں بھی شریک ہوتے رہے ہیں۔