سیالکوٹ:
غربت، مہنگائی اور ٹریفک پولیس کی مبینہ سختی سے دل برداشتہ ہو کر چار بچوں کے باپ نے اپر چناب نہر میں چھلانگ لگا کر اپنی زندگی کا خاتمہ کر دیا۔موصولہ اطلاعات کے مطابق، چائنہ سکیم سیالکوٹ کا رہائشی علی رضا جو کہ لوڈر رکشہ چلا کر اپنے گھر کا خرچ چلاتا تھا، گھر سے کام پر روانہ ہوا۔ عینی شاہدین کے مطابق سمبڑیال کے قریب ٹریفک پولیس نے اسے روکا اور مبینہ طور پر 2 ہزار روپے کا چالان کر دیا۔علی رضا نے پولیس اہلکاروں کے سامنے ہاتھ جوڑ کر منت سماجت کی کہ اس کے مالی حالات انتہائی خراب ہیں اور جیب میں پیسے نہیں ہیں، لہذا اس پر رحم کیا جائے، تاہم ٹریفک پولیس نے اس کی ایک نہ سنی۔ مالی تنگی اور 2 ہزار روپے کا چالان ادا کرنے کی سکت نہ ہونے پر دل شکستہ ہو کر علی رضا نے اپنا رکشہ وہیں روکا اور قریبی اپر چناب نہر میں چھلانگ لگا دی۔نہری پانی کے تیز بہاؤ اور گہرائی کے باعث موقع پر موجود لوگ اسے نہ بچا سکے، جبکہ ریسکیو ذرائع کے مطابق لاش کی تلاش کا عمل جاری ہے۔ جاں بحق ہونے والے علی رضا کے پسماندگان میں چار بیٹیاں اور ایک بیٹا شامل ہے، اور گھر میں پہلے ہی فاقہ کشی کی نوبت تھی۔ اہل علاقہ اور شہریوں نے اعلیٰ حکام سے واقعے کا نوٹس لینے کا مطالبہ کیا ہے۔