لندن / ویب ڈیسک:
دنیا بھر میں بڑھتے ہوئے ماحولیاتی بحرانوں، سائبر خطرات اور غیر متوقع ہنگامی صورتحال کے پیش نظر برطانوی حکومت نے ایک انتہائی اہم اور ہنگامی مہم کا آغاز کر دیا ہے، جس نے عالمی سطح پر بھی کھلبلی مچادی ہے۔ ’پریپئر‘ (Prepare) کے نام سے شروع کی جانے والی اس نئی مہم کے تحت برطانوی عوام کو سخت ہدایات جاری کی گئی ہیں کہ وہ کسی بھی ممکنہ بڑے قومی بحران یا ہنگامی آفت کے لیے فوری طور پر اپنے گھروں میں راشن اور ضروری سامان ذخیرہ کر لیں۔حکام کے مطابق، اس نئی ایڈوائزری کا مقصد کسی بھی ناگہانی صورتحال—جیسے شدید ترین طوفان، بجلی کا طویل غائب رہنا، یا نظامِ زندگی کو معطل کرنے والے سائبر حملوں—کے دوران ابتدائی چند روز تک شہریوں کو خود انحصار بنانا ہے۔ حکومت نے شہریوں پر زور دیا ہے کہ وہ درج ذیل احتیاطی تدابیر فوری طور پر اختیار کریں:خوراک اور پانی کا ذخیرہ: ایسے ڈبہ بند اور نان پیرشیبل (غیر خراب ہونے والے) کھانوں کا اسٹاک جو بغیر پکائے استعمال کیے جا سکیں (مثلاً ٹین بند غذائیں اور کین اوپنر)، ساتھ ہی پینے کے صاف پانی کی بوتلیں۔ہنگامی فرسٹ ایڈ کٹ: بنیادی طبی امداد کا سامان، ٹارچ، اضافی بیٹریاں، پورٹی پاور بینک اور بیٹری سے چلنے والا ریڈیو۔خصوصی دیکھ بھال: گھر میں موجود چھوٹے بچوں (بیبی فارمولا، ڈائپرز) اور پالتو جانوروں کی خوراک کا محفوظ بندوبست۔ماہرین کا کہنا ہے کہ یہ اقدام محض خوف پھیلانے کے لیے نہیں بلکہ کسی بھی بڑے بحران کے وقت معاشرے کی قوتِ مدافعت اور لچک (Resilience) کو مضبوط بنانا ہے تاکہ سرکاری امدادی اداروں کے پہنچنے سے پہلے شہری اپنی مدد آپ کے تحت محفوظ رہ سکیں۔