عمرکوٹ (بیورو رپورٹ: ڈاکٹر ایم لال واگھانی)
شہر کے شہید بے نظیر کمیونٹی ہال ڈھورونارو میں حیسکو (HESCO) کی جانب سے ایک بڑی کھلی کچہری کا انعقاد کیا گیا، جس میں بجلی کے زائد بلوں، غیر قانونی کٹوتیوں اور بقایا جات کے ستائے ہوئے صارفین نے بڑی تعداد میں شرکت کی۔کھلی کچہری کے دوران ایکس سی این حیسکو عمرکوٹ، علی رضا بھٹی نے ذاتی طور پر عوام کے مسائل سنے اور موقع پر ہی بجلی کے بلوں کی سخت جانچ پڑتال کی۔ اس دوران غیر قانونی طور پر لگائی گئی کٹوتیوں، اوور ریڈنگ والے بلوں اور بقایا جات میں فوری طور پر کٹوتیاں کر کے صارفین کو ریلیف فراہم کیا گیا۔حیسکو حکام کے بروقت اقدام سے صارفین کو لاکھوں روپے کا بڑا فائدہ پہنچا، اور بل درست ہوتے ہی شہریوں نے خوشی خوشی اپنے واجب الادا بل جمع کرا دیے۔اس موقع پر ایکس سی این علی رضا بھٹی نے گفتگو کرتے ہوئے واضح کیا کہ عوام وقت پر بجلی کے بل ادا کریں تاکہ بلا تعطل بجلی کی فراہمی ممکن ہو سکے۔ انہوں نے یقین دہانی کرائی کہ کسی بھی صارف کو غلط بل یا غیر قانونی کٹوتی کا سامنا نہیں کرنے دیا جائے گا اور شک موصول ہوتے ہی فوری کارروائی عمل میں لائی جائے گی۔ بروقت بلوں کی ادائیگی سے علاقے میں لوڈشیڈنگ کے مسائل کا بھی خاتمہ ہوگا۔